DILI, 10 Outubru 2025 (TATOLI)–Família vítima maskare Muapitine, Munisíoiu Lautein, sesta ne’e, hasoru malu ho Tenente Jenerál Lere Anan Timur hodi ko’alia kona-ba livru “RAJA VERRÍSSIMO DIAS QUINTA Saya Mati Untuk Kemerdekaan” ne’ebé eskritór Sérgio Paulo Dias Quintas hakerek, hamosu pro no kontra iha sosiedade nia leet tanba eskritór halo plájiu no halo distorsaun istória.
Notísia Relevante: Eskritór Sérgio Quintas halo plájiu no distorsaun istória
Tenente Jenerál Lere Anan Timur fó opsaun rua ba família vítima Masakre Muapitine ne’ebé lamenta ho livru ne’ebé hakerek husi eskritór Sérgio Paulo Dias Quintas ba-nia aman rasik Veeríssimo Dias Quintas.
“Ohin, família vítima Masakre Muapitine mai hasoru ha’u, sira ko’alia kona-ba katuas Veerisimo nia oan sira ne’ebé hakerek livru ida kona-ba istória funu nian. Ha’u hanoin, agora demokrasia, ema hotu bele hakerek istoria sira. Se ita sente livru ne’e sala, ita atu hasai ne’e difisíl. Entaun, saida mak ita halo. Primeiru, imi tenke hakerek mós imi-nia istória hodi kontra istória ne’ebé Verissimo nia oan sira hakerek. Segundu, imi la satisfás, bele lori ba tribunál,” Lere hateten ba jornalista sira hafoin hasoru malu ho família vítima Masakre Muapitine, iha nia Kere nia rezidensia, Faról.
Nia esplika, bainhira família vítima hakerek istoria loloos hodi kontra istória ne’ebé eskritór Sérgio Paulo Dias Quintas hakerek iha ninia livru “RAJA VERRÍSSIMO DIAS QUINTA Saya Mati Untuk Kemerdekaan”, fiar katak sei halakon kredibilidade husi livru ne’ebé Sérgio hakerek.
“Bainhira imi hakerek ona istoria ho loos mak imi-nia istoria ba kontra ona no sosiedade lee ona imi-nia livru ne’e, bele halakon livru ida katuas Verrísimo nian lakon kredibilidade, Naran katak, imi-nia livru hetan aseitasaun husi vítima sira no liuliu ema Lospalos. Ohin, sira mai esplika uluk Verrísimo halo saida-saida to’o mate, sira ko’alia hotu, ne’e mak ha’u haruka sira mós tenke hakerek sira-nia istoria rasik,” Lere hateten.
Entretantu, Lere Anan Timur husu ba família vítima masakre Muapitibe iha direitu atu lori kazy neé ba Tribunál, bainhira konsidera Sérgio Paulo Dias Quintas inventa dadus iha livru ne’ebé nia lansa tiha ona iha fulan-Agostu liuba ne’e.
“Imi sente livru katuas Verrísimo nia-oan sira hakerek ne’e inventa dadus no falsifika dadus, imi bele lori ba tribunál atu nune’e iha ne’ebá mak tetu. Ha’u nia hanoin rua ne’e, vítima sira konkorda hotu,” Lere dehan.
Iha fatin hanesan, reprezentante família vítima Joviano Saves hateten sira-nia parte konkorda ho opsaun rua ne’ebé Jenerál Lere Anan Timur fó ba sira, hodi kontra livru ne’ebé Sergio Quintás hakerek.
“Ohin, opsaun rua mak ita-nia aman Lere fó mai ami. Ami aseita ho opsaun rua ne’e. Ida, mak hakerek ami-nia istória ne’ebé loos no istória ami hakerek ona maibé seidauk ramata maibé Sergio Quintas ba kopia tomak ami-nia istória sira ne’e mak prodús iha nia livru ne’e. Ida fali, lori ba Tribunál ne’e, ami sei lori duni,” Joviano hateten.
Tuir nia, família vítima sei hasoru líder importante sira-ne’ebé sira-nia naran hakerek iha livru neé nia laran hanesan Prezidente Repúblika José Ramos-Horta, Primeiru-Ministru Kay Rala Xanana Gusmão, Sekretariu Jerál Partidu FRETILIN Marí Alkatiri no Tenente Jenerál Reformadu Lere Anan Timur, atu hato’o katak istória ne’ebé eskritór hakerek maiória falsifika no la tuir realidade.
“Líder sira-ne’ebé Sergio Quintas tau iha nia livru ne’e hanesan ema-ne’ebé hetan rekoñesementu ba livru ne’e, ami buka meiu atu hasoru hotu sira. Agradese tanba ita-nia aman Lere ohin ami hasoru ona. Ami sei hasoru tan ita-nia Prezidente Repúblika, José Ramos Horta, Primeiru-Ministru Kay Rala Xanana Gusmão no Sekretariu Jerál FRETILIN Marí Alkatiri, atu sira haree didi’ak no rona istória loos husi ami família vítima sira,” Joviano dehan.
Nia hateten, objetivu atu hasoru líder hirak ne’e tanba família vítima Masakre Muapitine deskonfia katak eskritór utiliza lider hirak ne’e hodi bele justifika katak livru “RAJA VERRÍSSIMO DIAS QUINTA Saya Mati Untuk Kemerdekaan” ne’ebé eskritór Sérgio Paulo Dias Quintas hakerek ne’e hakerek ho lia-loos no loloos.
“Ami deskonfia katak eskritór uza lider importante hirak ne’e hodi justifika katak istória ne’e loos ona, entaun ami sei hasoru sira ida-ida atu jsutifika no ko’alia istória loloos ba sira,” nia dehan.
Notísia Relevante: Eskritór dedika livru ‘Ha’u mate tanba ukun rasik-an’ ba Liurai Veríssimo
Jornalista : Hortencio Sanchez
Editór : Cancio Ximenes
