DILI, 08 Outobru 2025 (TATOLI)—Governu aprova proposta memorandu entendimentu (MoU) entre Governu Malázia no Timor-Leste ba kooperasaun iha área informasaun no dezenvolvimentu mídia, ne’ebé aprezenta husi Sekretáriu Estadu Komunikasaun Sosiál, Expedito Loro Dias Ximenes iha Reuniaun Konsellu Ministru ne’ebé hala’o iha Palásiu Governu, kuarte ne’e.
Asina nota entendimentu ne’e, kooperasaun husi Sekretáriu Estadu Komunikasaun Sosiál, Expedito Loro Dias Ximenes no Ministru Komunikasaun Sosiál Malázia nian, Mohamad Fadzil ne’ebé sei hala’o iha simeira ASEAN iha loron 26 Outobru 2025 iha Kuala Lumpur, Malázia.
“Ha’u ohin aprezenta iha Konsellu ministru tamba iha ámbitu bainhira Primeiru-Ministru Malázia nia mai vizita iha ita-nia rai ne’ebé akompaña ho Ministru Komunikasaun Sosiál Malázia no iha enkontru informál ne’ebé ami halo buka maneira oinsá bele servisu hamutuk iha área informasaun no dezenvolvimentu mídia nian,” Sekretáriu Estadu Komunikasaun Sosiál ne’e informa ba jornalista sira iha ninia knaar fatin, Palásiu Governu, ohin.
Husi diskusaun téknika ne’ebé la’o konsege hetan proposta husi parte rua no ohin nia kontinua halo aprezentasaun iha Konsellu ministru kona-ba nota entendimentu ida-ne’e ho ninia objetivu atu fó forsa ba relasaun bilaterál ne’ebé iha ona entre Malázia no Timor-Leste hodi promove kooperasaun iha área informasaun no meiu komunikasaun sosiál.
“Kooperasaun ne’e válidu durante tinan lima maibé bainhira hakarak hapara akordu tenke fó hatene uluk durante fulan tolu no hapara akordu sei la afeta ba projetu sira ne’ebé hahú hala’o tiha ona,” nia dehan.
Dirijente orgaun komunikasaun ne’e informa, área kooperasaun sira-ne’ebé sei halo iha nota entendimentu ne’e mak hanesan transformasaun dijitál no inovasaun mídia, polítika informasaun no regulamentasaun teknolojia, troka notísia no konteúdu, radiudifuzaun, televizaun no sinema, formasaun no dezenvolvimentu rekursu umanu no kombate dezinformasaun (Hoax).
“Forma kooperasaun sira ne’e sei troka informasaun no jornalista sira husi Timor sei halo vizita esperénsia profisionál iha Malázia, koprodusaun ka halo programa konjuntu ida, jornalista sira sei tuir mós kursu no semináriu ne’ebé sei fasilita husi mídia Malázia inklui apoiu tékniku no fahe informasaun kona-ba nasaun seluk,” nia hateten.
Enkuantu, unidade responsável ba husi Timor-Leste mak Sekretária Estadu Komunikasaun Sosiál no Ministériu Komunikasaun Sosiál Malázia enkuantu entidade ezekutór ba kooperasaun maka hanesan, Sekretária Estadu Komunikasaun Sosiál (SEKOMS), Agensia TATOLI, I.P, RTTL, E.P, Rádiu Televizaun Malázia (RTM), BERNAMA, Malázia Communication and Multimedia Comission (MCMC) no Institut Penyaran dan Penerangan Tun Abdul Razak (IPPTAR).
Jornalista : Alexandra da Costa
Editór : Cancio Ximenes
