DILI, 02 Outobru 2025 (TATOLI)—Empreza Caviq Unipesoál, Lda, no kompañia Saksaur Ldma klarifika kona-ba projetu reabilitasaun estrada haleuLlagoa Seloi iha Postu Administrativa Aileu Villa, Munisípiu Aileu.
Notísia Relevante: Autoridade Ermera husu Governu troka kompañia reabilta estrada haleu Lagoa Seloi
Diretór Empreza Caviq Unipesoál, Lda, Leonel Pinto Rangel, hateten projetu ida-ne’e servisu pakote kompostu husi empreza haat no kada implementasaun servisu kompañia nian lahanesan, maibé ninia prosesu besik finaliza ona.
“Ha’u-nia servisu besik finaliza ona tanba durante ne’e ha’u halo de’it servisu loke estrada kilometru ualu (8), drainajen, moru protesaun no halo ponte kiik 28. Enkuantu kona-ba prosesu ateru rai no fui alkatraun ne’e empreza seluk mak implementa fali,” Diretór ne’e informa ba Agência Tatoli liuhusi telefónika, ohin.
Projetu ne’e ninia empreza hala’o atinje ona 98% tanba hela de’it konstrusaun ponte ki’ik rua (2) mak daudaun ne’e traballadór sira solda hela besi, loloos ne’e finaliza hotu ona maibé tanba iha variasaun mudansa ajustamentu mak kle’ur, nia sei esforsu iha fulan-Outobru nia laran bele finaliza ona.
“Impaktu seluk mak komunidade tenke halo movimentu husi ponte ki’ik rua ne’e, entaun ha’u haruka ona karta ba líder komunitária atu taka lai rute husi ponte ne’e, atu ami bele finaliza lalais,” nia dehan.
Enkuantu, nia informa, projetu ne’e hahú kontrata iha tinan 2020 ho orsamentu rihun $700-resin, maibé tanba situasaun COVID-19 nune’e paradu tiha, no hafoin kontinua fali iha tinan 2023 no ninia kontratu sei ramata iha fulan-Dezembru 2025.
“Maske Governu fó tempu to’o fulan-Dezembru maibé ha’u aselera lalais atu ramata iha fulan ida-ne’e, nune’e entrega ona ba Governu no fó fali empreza seluk kontinua nia servisu, se lae ema hanoin katak projetu ne’e ha’u mesak mak halo de’it,” nia dehan.
Ida-ne’e, nia sente hanesan fó todan fali ba nia tanba kompañia seluk la servisu entaun la atinje 60% ne’e sira so’e hela tiha servisu ne’e, tanba fahe pakote kada empreza ka’er estrada kilometru rua (2).
Iha sorin seluk, Diretór Kompañia Saksaur, Edigar Siri de Araújo Xavier, hateten servisu durante ne’e la abandona maibé servisu tuir faze ba faze, tanba projetu ne’e pakote entaun empreza ida halo ninia hotu ona entaun empreza seluk kontinua.
“Servisu balun mak lala’o tamba iha kompañia ida ne’ebé kaer projetu konstrusaun ponte ho moru protesaun sira-ne’e la’o tarde, nune’e prejudika ami-nia servisu tarde tanba tenke hein empreza ne’e nia servisu ramata hafoin ami kontinua nahe alkatraun kasar,” nia hateten.
Iha situasaun ne’e, nia dehan, xefe suku sira mós tenke komprende tanba projetu ne’e fahe ba pakote entaun sira labele mobiliza lai ekipamentu tanba sasán materiál sira mós folin karun. Nune’e, hakarak ka lakohi, empreza Caviq Unipesoál, Lda, halo hotu tiha lai nia servisu foin ita kontinua atu servisu, se lae servisu la’o para sei prejudika ba empreza.
“Ami-nia supervizór iha terenu mós halo hela no informasaun dehan projetu ne’e abandona durante tinan neen (6) ne’e la loos. Projetu ne’e hahú iha 2022 ho orsamentu rihun $700-resin, la’os kona-ba tinan neen (6) ne’e empreza ida Caviq ninian,” nia dehan.
Entretantu, projetu ne’e implementa husi kompañia haat hanesan empreza Caviq Unpesoál, Lda, empreza Saksaur Unipesoál, Lda, empreza LNG Unipesoál, Lda no empreza Mortiles Unipesoál, Lda.
Jornalista : Alexandra da Costa
Editór : Cancio Ximenes
