DILI, 08 Outobru 2025 (TATOLI)—Ministériu Turizmu liuhusi Diretór Jerál Turizmu, António da Silva, hateten tinan oin Governu sei garante hodi hadi’a fasilidade infraestrutura sira iha fatin turizmu sira-ne’ebé sai prioridade ba sítiu turístiku.
Diretor Jerál Turizmu, António da Silva, afirma loos duni iha eventu forum investimentu foin daudaun ne’e iha sesaun importante balun ne’ebé Governu halo diálogu ho setór privadu sira-ne’ebé durante ne’e halo investimentu ba área turizmu, otelária no fornesedór ba akomodasaun.
“Iha atividade ne’e kuaze setór privadu barak mak rekomenda fasilidade infraestrutura iha fatin turizmu. Maibé, kona-ba faailidade ita labele haree buat boot liu ita maibe ita presiza haree ba fasilidades ne’ebé bele fasilita bainaka sira hanesan haris fatin públiku,” Diretór Jerál ne’e informa ba Agência Tatoli iha nia kna’ar fatin, Vila Verde, ohin.
Membru Governu ne’e haktuir, se bele fatin sira-ne’ebé sai destinasaun turizmu bele reabilita tiha ho kualidade ne’ebé di’ak tanba bainhira Timor-Leste sai ona membru ofisiál ba ASEAN, entaun tenke kria fasilidade públiku tuir estandar internasionál ne’ebé ASEAN rekomenda.
“Nune’e, rekomendasaun sira-ne’e ita sei tau hamutuk atu nune’e iha tinan oin ita bele asegura atu prienxe mós rekezitu ASEAN nian,” nia hateten.
Aleinde ne’e, nia hatutan, iha buat seluk kona-ba utilizasaun espasu ba konstrusaun fatin turizmu ruma no setór privadu sira rekomenda atu apar ho paisajen no kondisaun, hanesan iha fatin ne’ebé matak presiza halo uma duut atu prezerva paisajen tradisionál ne’e furak nafatin.
“Signifika katak presiza envolve mós setór privadu atu servisu, tau ideia hamutuk ho Governu halo planeamentu, implementasaun no monitorizasaun hodi dezenvolve setór turizmu iha Timor-Leste,” nia hateten.
Enkuantu, durante ne’e Ministériu Turismu no Ambiente halo investimentu ba Asosiasaun Nasionál Turístiku sira hanesan turismu mariña, otelária, turiszu relijiozu, Ajénsia Tour no maneira Investe iha termu fasilidade, kapasitasaun rekursu umanu no dijitál marketing,
Ministériu Turismu no Ambiente servisu hamutuk ho Ministériu Planeamentu no Investimentu Estratéjiku (MPIE) ne’ebé fó rekomendasaun saida mak setór turizmu presiza apoiu, tanba ne’e presiza hadia estrada, bee-moos, eletrisidade no sistema telekomunikasaun.
“Estrada balun ami identifika mak hanesan iha Ramelau, Soibada, Lautein no Seloi Kraik Aileu, inklui Rabilau Maubisse,” nia dehan.
Jornalista : Akexandra da Costa
Editór : Cancio Ximenes
