DILI, 08 Outubru 2025 (TATOLI)-Parlamentu Nasionál (PN) sei realiza, iha munisípiu Likisá, Panorama Orsamentál 2026, durante loron 16 to’o 17 Outubru.
Prezidente Komisaun C trata Asuntu Finansa Públika, Cedelízia Faria dos Santos, dehan Komisaun halo ona aprovasaun kalendáriu diskusaun proposta Lei Orsamentu Jerál Estadu (OJE) 2026, ne’ebé sei hahú husi semináriu ne’e konvida parte Governu, Kámara Konta, Banku Sentrál Timor-Leste (BCTL), Banku Mundiál no Prezidente Autoridade Munisípiu.
Iha loron 20 to’o 23 Outubru, Komisaun sira sei halo audiénsia públika ho liña ministeriál sira.
“Tuir planu, kalendáriu diskusaun jeneralidade iha 05 até 07 Novembru no kontinua ba espesialidade iha 10 até 24 Novembru [hafoin] halo redasaun finál no 25 Novembru bele haruka ba Prezidente Repúblika [hodi halo promulgasaun]”, nia informa hafoin reuniaun Komisaun iha Parlamentu, ohin.
Lembra katak Ministéiru Finansa (MF) iha loron 01 Outubru ne’e submete ona proposta lei OJE ba tinan fiskál 2026 ho montante billaun $2,3 ba PN.
Notísia relevante: https://tatoli.tl/2025/10/01/governu-aprezenta-ona-proposta-lei-oje-2026-ba-parlamentu-nasional/
Jornalista: Nelson de Sousa
Editora: Maria Auxiliadora
