VIKEKE, 17 Outubru 2025 (TATOLI)–Diretora Jestaun Merkadu no Turizmu (JMT) Munisípiu Vikeke, Mirandolina Fátima da Costa Guterres, informa hahú husi fulan-Janeiru to’o Outubru 2025 konsege rekolla taxa publisitária hamutuk $3.310,52 ba kofre Estadu.
“Durante ne’e ami hala’o servisu ba implementasaun lisensa publisitária husi loja 22 ne’ebé kobre osan hamutuk $3.310,52 ba kofre Estadu,” nia dehan ba TATOLI iha Vikeke, Sesta ne’e.
Enkuantu, JMT Vikeke rekolla taxa kada tinan hahú 2022 hamutuk $1.783,94, tinan 2023 hamutuk $2.511,20, tinan 2024 hamutuk $3.188.14 no taxa ba tinan 2025 hamutuk $3.310,52.
Nia dehan, dezafiu ne’ebé durante ne’e Servisu Munisipál JMT enfrenta mak seidauk emite halo rejistasaun komersiál tanba seidauk hetan kooperasaun ho ministériu relevante liuliu SERVE, I.P. tanba sira mak fó lisensa ba negosiante sira.
“Dezafiu ida seluk mak transporte. Kuandu ami ba hato’o mensajen publisitária ruma ami tenke halo pedidu ba PAM, karreta livre mak ami uza. Maibé kuandu karreta la livre ami labele la’o. Ida-ne’e mak sai hanesan dezafiu ida ba ami,” nia dehan.
Entretantu, funsionáriu JMT hamutuk na’in-ualu (8) kompostu husi diretór no xefe departamentu na’in-rua (2) no funsionáriu na’in-lima (5) ne’ebé ativu servisu iha diresaun JMT Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
