DILI 18 Outubru 2025 (TATOLI)—Antigu Alunu Institutu Superiór Dom Bosco (ISDB), Sábadu ne’e, realiza enkontru daruak hodi estabelese estrutura sai hanesan asosiasaun.
“Antingu Alunu Institutu Superiór Dom Bosco realiza enkontru daruak hodi ko’alia kona-ba estabelesimentu estrutura nune’e ba oin bele kontribui ba prosesu dezenvolvimentu iha instututu no nasaun,” Diretor ISDB, Padre Manuel Pinto hateten, ba Ajénsia TATOLI iha Dom Bosco, Komoro.
Nia dehan, enkontru ne’e atu finaliza mós estatutu antigu alunu, nu’udar rekezitu ida atu harii organizasaun ida.
“Iha sosiedade ne’e atu hala’o organizasaun ka instituisaun ruma ita presiza iha nia lei, regra ka iha estatutu, depoisde nia planu estratéjiku tantu kurtu prazu, mediu prazu no longu prazu,” nia akresenta.
Notísia relevante : Diákonu na’in-tolu hosi Kongregasaun Salezianu simu ordenasaun saserdotál
Liuhusi enkontru ne’e, antigu alunu ko’alia kona-ba estatutu, liliu foku liu ba artigu ne’ebé ko’alia kona-ba finansimentu no patrimoniál sira.
“Ita pending lai tanba buat rua ne’ebé sensitivu oituan kona-ba osan, ne’ebé ami sei halo fali enkontru seluk atubele klarifika depois bele finaliza ida-ne’e,” Diretor ISDB tenik.
Nia konsidera, finansiamentu hanesan kestaun importante ba organizasaun ida atubele realiza programa no atividade sira.
Aleinde ne’e, durante enkontru fó pose ba estutura Antigu Alunu ISDB, ba diresaun sira ne’ebé antes ne’e iha ona. Tanba antigu alunu husi institutu ne’e maioria hanesan antigu salezianu hotu.
“Sira la’ós de’it ba akadémiku maibé antigu alunu iha institusaun karizmatiku ida-ne’e,” nia katak.
Mandatu ba emposadu sira ne’e to’o tinan-tolu, hahú tinan 2025 to’o 2028.
“Sira sei aprezenta sira-nia kandidatu iha kongresu, depois sira sei aprezenta sira-nia atividade no buat balun ne’ebe la’o di’ak bele kontinua,” nia katak.
Jornalista : Natalino Costa
Editora : Julia Chatarina
