Vantajen no desvantajen adezaun Timor – Leste bá ASEAN

Husi: Angenilio dos Reis Jerónimo, Jurista, Asesór Legál Prezidente Autoridade Munisipál Baucau

Artigu ida-ne’e hakarak atu analiza vantajen no desvantajen husi Timor-Leste nia adezaun ba ASEAN, hodi konsidera dimensaun polítika, ekonómika, sosiál, institusionál, no dezafiu internu ne’ebé Timor-Leste sei hasoru iha futuru.

Introdusaun

 Timor-Leste nia adezaun ba Asosiasaun Nasaun  Sudeste Aziátiku  (ASEAN) konstitui marka ida ne’ebé signifikativu liu iha polítika externa Timor-Leste nian dezde restaurasaun independénsia iha tinan 2002. Timor-Leste lokaliza estratéjikamente iha rejiaun Sudeste Aziátiku, durante ne’e ita nafatin buka atu konsolida ita-nia pozisaun iha palku rejionál no internasionál no hahú halo prosesu integrasaun ASEAN, ne’ebé formalmente inisia iha 2011, kulmina iha aseitasaun Timor-Leste nian nu’udar membru observadór iha 2022, no tuir mai, hahú prosesu adezaun tomak. Timor-Leste afirma nia-an nu’udar soberanu, pasífiku, kooperativu, no esforsa-an atu integra tomak ba nia estadu rejionál komunidade. Iha sentidu ida-ne’e, integrasaun ba ASEAN mosu nu’udar desizaun polítika no diplomátika estratéjika ida, ne’ebé dezeña atu hametin Timor-Leste nia knaar iha kontestu rejionál no internasionál.

Husi perspetiva legál no konstitusionál, bazeia ba Artigu 8⁰ Konstituisaun Repúblika Demokrátika Timor-Leste (CRDTL), ne’ebé estabelese katak Estadu tenke “promove estabelesimentu no dezenvolvimentu relasaun amizade no kooperasaun ho povu no Estadu hotu-hotu, bazeia ba prinsípiu igualdade, soberania, no respeitu malu.” Nune’e, polítika integrasaun ASEAN nian kompletamente tuir prinsípiu kooperasaun internasionál, reflete dezeju konstitusionál atu integra Timor-Leste iha konsertu nasaun sira-nian iha ninia rejiaun jeopolítika naturál nia laran.

ASEAN, harii iha tinan 1967, agora daudaun hanesan bloku rejionál ida ne’ebé importante liu iha mundu, ne’ebé kompostu husi nasaun membru sanulu-resin ida hanesan: Indonézia, Malázia, Singapura, Tailándia, Filipina, Brunei, Vietname, Laos, Myanmar, Kamboja no Timor-Leste. Ho populasaun aproximadamente millaun 676,6 no Produtu Internu Brutu (PIB) kombinadu ho nia estimasaun aproximadamente US$3.6 trilioens, bloku ne’e reprezenta sentru ida ba podér ekonómiku, polítiku no kulturál iha Sudeste Aziátiku. Haree ba senáriu ida-ne’e, Timor-Leste nia partisipasaun oferese vantajen estratéjika iha dimensaun múltiplu: polítika, ekonómika, sosiál, no institusionál.

Polítikamente, adezaun ba ASEAN hametin prezensa diplomátika Timor-Leste nian, hodi garante nia kna’ar ativu iha prosesu foti desizaun rejionál sira no hodi defende prinsípiu pás no estabilidade nian. Ekonómikamente, ida-ne’e loke odamatan sira ba integrasaun iha merkadu rejionál, hodi haburas komérsiu, investimentu, no diversifikasaun ekonomia nasionál nian. Sosialmente no kulturalmente, kooperasaun ho Estadu-membru sira sei permite interkámbiu edukasionál, sientífiku, no teknolójiku, ne’ebé fundamentál ba dezenvolvimentu kapitál umanu no konsolidasaun kapasidade institusionál Estadu nian.

Alénde ne’e, integrasaun iha ASEAN simboliza rekoñesimentu internasionál ba Timor-Leste nia maturidade polítika no administrativa, hodi hatudu katak T-L preparadu atu partisipa ativamente iha dinámika rejionál no kontribui ba konstrusaun komunidade aziátika ida ne’ebé koezivu, pasífiku, no fó apoiu.

Nune’e, Timor-Leste nia adezaun ba ASEAN la limita de’it ba kestaun prestíjiu diplomátiku, maibé tradús ba instrumentu dezenvolvimentu nasionál, ne’ebé iha kapasidade atu hametin soberania, promove estabilidade interna, no aselera progresu ekonómiku no sosiál nasaun nian.

2. Vantajen Timor-Leste nia adezaun ba ASEAN

2.1. Integrasaun rejionál no kooperasaun polítika

Integrasaun rejionál no kooperasaun polítika konstitui pilar fundamentál ida husi adezaun Timor-Leste nian iha Asosiasaun Nasaun Sudeste Aziátiku (ASEAN). Dezde nia kriasaun iha tinan 1967, ASEAN nia objetivu prinsipál maka atu promove pás, estabilidade, no prosperidade iha rejiaun liu husi kooperasaun polítika, ekonómika, sosiál, no kulturál entre nia membru estadu sira. Ba Timor-Leste, adezaun ba bloku ne’e la’ós de’it opsaun diplomátika, maibé estratéjia esensiál ida atu konsolida soberania no hametin prezensa internasionál.

Husi perspetiva legál no konstitusionál, polítika integrasaun ne’e hetan apoiu hosi Artigu 8 Konstituisaun Repúblika Demokrátika Timor-Leste (CRDTL), ne’ebé determina katak Estadu tenke “promove estabelesimentu relasaun amizade no kooperasaun ho povu no Estadu hotu-hotu, bazeia ba prinsípiu igualdade, soberania, no respeitu malu.” Nune’e, adezaun ba ASEAN reprezenta kumprimentu mandatu konstitusionál kooperasaun pasífika no integrasaun rejionál, ne’ebé orienta husi prinsípiu solidariedade no konvivénsia armonioza entre nasaun sira.

Polítikamente, integrasaun sei permite Timor-Leste partisipa ativamente iha prosesu foti desizaun rejionál sira no hametin ninia pozisaun diplomátika iha Sudeste Aziátiku. Nu’udar membru ASEAN, Timor-leste sei iha asentu ka reprezentante iha fórum multilaterál, hanesan ASEAN Regional Forum (ARF),  East Asia Summit (EAS) no ASEAN Intergovernmental Commission on Human Rights (AICHR). Mekanizmu sira ne’e fornese forum ida hodi diskute kestaun sira kona-ba seguransa, direitus umanus, diplomasia, dezenvolvimentu sustentável, no kooperasaun intergovernamentál.

Aspetu seluk ne’ebé relevante mak, hametin kooperasaun bilaterál no multilaterál. ASEAN atua hanesan plataforma ida ne’ebé fasilita diálogu polítiku entre Estadu-membru sira no ho parseiru externu sira, inklui nasaun poténsia sira hanesan Xina, Japaun, Koreia-Súl, Estadus Unidus, no Uniaun Europeia. Ba Timor-Leste, rede relasaun ne’e oferese oportunidade foun ba parseria estratéjiku, asesu ba programa asisténsia téknika, no kooperasaun iha área sira hanesan boa governasaun, administrasaun públika, kombate korrupsaun, no reforsu institusionál.

Ikus liu, integrasaun polítika iha ASEAN nia laran kontribui ba hametin Timor-Leste nia demokrasia, tanba nasaun ne’e sai parte ba espasu rejionál ida ne’ebé promove estabilidade no rezolusaun pasífika ba disputa sira. Diálogu ne’ebé la’o hela ho nasaun sira iha rejiaun sei permite troka esperiénsia iha governasaun, diplomasia, no dezenvolvimentu institusionál, ne’ebé tradús iha benefísiu diretu ba konsolidasaun estadu direitu demokrátiku iha Timor-Leste.

2.2. Benefísiu ekonómiku no komérsiu

Timor-Leste nia adezaun ba Asosiasaun Nasaun Sudeste Aziátiku nian (ASEAN) aprezenta oportunidade estratéjiku ida atu hametin ekonomia nasionál, diversifika fonte reseita sira, no integra iha bloku ekonómiku ida ne’ebé dinámiku liu iha mundu. ASEAN, ho populasaun liu millaun 600 no ho Produtu Internu Brutu (PIB) kombinadu liu 3 triloens dolar amerikanu, konstitui merkadu boot dalima iha mundu, hatudu nia pezu ekonómiku no importánsia husi partisipasaun tomak Timor-Leste nian iha espasu rejionál ida-ne’e.

Ekonómikamente, ASEAN promove prinsípiu sirkulasaun livre ba sasán, servisu, kapitál, no investimentu liu husi  ASEAN ECONOMIC COMMUNITY (AEC), ne’ebé estabelese formalmente iha tinan 2015. Mekanizmu ne’e ho objetivu atu halakon barreira komérsiu no tarifa entre Estadu-membru sira, hodi kria merkadu komún ida ne’ebé kompetitivu no integradu. Timor-Leste nia adezaun ba komunidade ida ne’e sei habelar komérsiu externu, atrai investimentu estranjeiru direta, no hadi’a produtividade nasionál, buat sira ne’e hotu nu’udar fatór esensiál ba dezenvolvimentu ekonómiku ne’ebé sustentável.

Tuir Planu Komunidade Ekonómika ASEAN 2025, nasaun membru sira kompromete atu haburas ambiente ekonómiku ida ne’ebé previzível no estável bazeia ba regra sira ne’ebé transparente no kooperasaun regulatóriu. Ba Timor-Leste, ida-ne’e reprezenta oportunidade ida atu moderniza nia instituisaun ekonómika sira no kria kondisaun sira ne’ebé favorável liu ba investimentu privadu, doméstiku, no estranjeiru.

Oras ne’e daudaun, ekonomia T-L nian depende maka’as ba reseita sira husi setór petrolíferu no husi Fundu Nasionál Petróleu. Adezaun ba ASEAN oferese posibilidade atu diversifika báze ekonómika, promove kreximentu setór produtivu sira hanesan agrikultura, peska, turizmu, manufatura, no servisu sira. Liu husi integrasaun rejionál, Timor-Leste sei bele hetan benefísiu husi projetu kooperasaun téknika no teknolójika, no mós fundu dezenvolvimentu rejionál ba nasaun sira ho rendimentu ki’ik liu, hanesan Laos, Kamboja, no Myanmar ne’ebé hetan ona fundu ida ne’e.

Benefísiu importante seluk maka kona-ba fasilitasaun komérsiu no asesu ba merkadu foun sira. Ho adezaun ba ASEAN, Timor-Leste sei adere ba Área Komérsiu Livre liu husi ASEAN FREE TRADE AREA (AFTA), ne’ebé hakarak hamenus tarifa alfándega no harmoniza regulamentu importasaun no esportasaun. Ida-ne’e sei permite empreza Timor-Leste sira atu exporta produtu lokál sira ho kustu ne’ebé ki’ik liu no kompetitividade ne’ebé boot liu, prinsipalmente sasán agríkola sira, kafé, artezanatu, no ai-han tasi nian. Iha tempu hanesan, nasaun sei bele importa sasán no teknolojia sira ho folin ne’ebé baratu liu, hodi estimula konsumu doméstiku no dezenvolvimentu industriál.

ASEAN mós mantein akordu komersiál ho ekonomia globál prinsipál sira, hanesan Xina, Japaun, Koreia-Súl, Índia, Austrália, no Nova Zelándia, liu husi REGIONAL COMPREHENSIVE ECONOMIC PARTNERSHIP (RCEP). Timor-Leste nia partisipasaun iha akordu ne’e, liu husi ASEAN, sei fó asesu preferensiál ba merkadu globál sira, hametin exportasaun no integrasaun iha kadeia valór rejionál no internasionál sira.

Alénde ne’e, fluxu komérsiu no investimentu ne’ebé aumenta iha tendénsia atu hamosu empregu no hamenus kiak, hodi estimula kreximentu inkluzivu. Adezaun sei permite nasaun atu hadi’a nia lojístika no infraestrutura portuária, moderniza nia sistema alfándega, no promove parseria públiku-privadu (PPP) ba dezenvolvimentu transporte, enerjia, no komunikasaun no setór sira ne’ebé fundamentál ba kreximentu ekonómiku sustentável.

Husi perspetiva institusionál, ASEAN fornese mekanizmu asisténsia téknika no finanseira hodi apoia nasaun sira ne’ebé menus dezenvolvidu iha implementasaun reforma ekonómika no administrativa. Timor-Leste sei hetan benefísiu husi programa sira atu hametin governasaun ekonómika, simplifika prosedimentu sira negósiu nian, no harii kapasidade rekursu umanu nian. Programa sira ne’e sei kontribui ba hasa’e kompetividade no produtividade nasionál, elementu esensiál sira ba ekonomia ida ne’ebé nakloke no integradu.

Ikus liu, integrasaun ekonómika iha ASEAN nia laran sei kontribui ba hasa’e Timor-Leste nia kredibilidade internasionál nu’udar destinu investimentu. Previzibilidade husi regra rejionál sira, estabilidade polítika, no kompromisu ba padraun komérsiu internasionál sira sei hametin konfiansa investidór nian, hodi permite nasaun atu hakat ba ekonomia ida ne’ebé sólidu, diversifikadu no reziliente liu.

Tanba ne’e, benefísiu ekonómiku no komersiál husi Timor-Leste nia adezaun ba ASEAN luan no estratéjiku: diversifikasaun produtiva, atrasaun investimentu, espansaun komérsiu, kriasaun empregu, no integrasaun iha kadeia valór globál sira. Iha longu prazu, lukru hirak ne’e bele transforma estruturalmente ekonomia Timor nian, hodi hamenus dependénsia ba rekursu naturál sira.

2.3. Kooperasaun iha edukasaun, kultura, no dezenvolvimentu umanu

ASEAN promove inisiativa kooperasaun edukasionál no kulturál oioin, hanesan programa interkámbiu no bolsa estudu (Rede Universitáriu ASEAN). Ida-ne’e sei haburas formasaun ba joven timoroan sira no hametin kapitál umanu, hodi kontribui ba dezenvolvimentu sustentável no hamenus dezigualdade sosiál sira.

2.4 Fundasaun ekonómika no dezenvolvimentu

ASEAN maka bloku ekonómiku ida ne’ebé dinámiku liu iha mundu, ho Produtu Internu Brutu (PIB) kombinadu liu biliaun US$3.6 (2023) no populasaun liu millaun 600. Timor-Leste nia adezaun loke asesu ba merkadu luan ida ne’e liu husi Área Komérsiu Livre ASEAN (AFTA), ne’ebé hakarak halakon tarifa no barreira komérsiu entre nasaun membru sira.

Vantajen ekonómiku prinsipál sira inklui:

Atrai Investimentu Diretu Estranjeiru: Integrasaun rejionál hasa’e konfiansa investidór internasionál sira, tanba koloka Timor-Leste iha enkuadramentu legál no ekonómiku ne’ebé hanesan ho ASEAN, hodi garante previzibilidade no estabilidade.

Diversifikasaun Ekonómika: Adezaun estimula dezenvolvimentu setór naun-petrolíferu sira hanesan agrikultura, turizmu, peska, no indústria kriativu sira hamenus dependénsia ba reseita petrolíferu no Fundu Petrolíferu.

Asesu ba Fundu no Programa Apoiu: ASEAN fornese mekanizmu asisténsia téknika no finanseira ba estadu-membru sira ne’ebé menus dezenvolvidu, hanesan Laos, Kamboja, no Myanmar. Timor-Leste bele hetan benefísiu hosi kooperasaun téknika, kapasitasaun administrativa, no programa dezenvolvimentu infraestrutura.

Integrasaun iha Kadeia Valór Rejionál sira: Adezaun sei permite produtu Timor-Leste (hanesan kafé, produtu agríkola, no artezenatu) atu fasil liu tama iha merkadu rejionál sira liu husi akordu preferensiál sira.

Ho liafuan badak, ASEAN oferese ba Timor-Leste plataforma ida atu moderniza ekonomia, hadi’a ambiente negósiu, no hasa’e kompetividade internasionál.

2.5 Fundamentu Institusionál no Jurídiku

Atu tama iha ASEAN presiza fortalesimentu institusionál no armonizasaun regulatóriu. Prosesu ida-ne’e bele fó benefísiu ba Timor-Leste, tanba enkoraja modernizasaun administrasaun públika no adosaun prátika governasaun di’ak, transparénsia, no responsabilizasaun.

ASEAN apoia nia estadu membru sira iha reforma jestaun públika, hadi’a sistema justisa sira, no dijitalizasaun administrativa. Timor-Leste bele hetan benefísiu hosi kooperasaun téknika, troka esperiénsia, no fahe prátika di’ak liu ho nasaun sira hanesan Singapura no Malázia, ne’ebé sai hanesan referénsia iha efisiénsia administrativa.

Legalmente, adezaun mós hametin Timor-Leste nia pozisaun iha negosiasaun tratadu internasionál sira, respeitu ba norma rejionál sira, no kooperasaun transfronteirisu, buat sira-ne’e hotu kontribui ba hametin estadu direitu no seguransa jurídika interna.

3. Desvantajen no dezafiu sira husi adezaun

3.1. Frajilidade ekonómika no kapasidade institusionál

Timor-Leste nia adezaun ba ASEAN hasoru dezafiu boot ida tanba ita nia estrutura ekonómika ne’ebé frajil no kapasidade institusionál ne’ebé limitadu. Desde restaurasaun independénsia iha tinan 2002, T-L buka konsolida ninian instituisaun sira no diversifika  ekonomia, ne’ebé depende maka’as nafatin ba reseita sira husi setór petrolíferu no Fundu Nasionál Petróleu. Dependénsia ida-ne’e kria vulnerabilidade ba flutuasaun iha folin mina-rai no inserteza sira kona-ba sustentabilidade finansas públikas ba tempu naruk.

Integrasaun iha ASEAN ezije Timor-Leste atu adota no implementa norma, polítika, no mekanizmu lubuk ida ne’ebé karakteriza bloku funsionamentu, inklui kompromisu sira kona-ba komérsiu, investimentu, ambiente, transporte, no dezenvolvimentu sustentável. Maski nune’e, kapasidade administrativa no téknika Estadu T-L nian limitadu nafatin atu kumpri tomak rekizitu institusionál no regulatóriu sira ne’ebé impoin hosi tratadu no akordu rejionál sira.

Tuir análize sira husi Sekretariadu ASEAN (2022) no Banku Mundiál (2023), Timor-Leste hasoru nafatin dezafiu estruturál sira hanesan produtividade setór privadu ne’ebé ki’ik, falta infraestrutura adekuada, burokrasia administrativa, sistema judisiál no seluk tan. Fatór sira-ne’e difikulta nasaun nia ambiente negósiu no kompetitividade iha kontestu rejionál nia laran.

Alénde ne’e, administrasaun públika estadu T-L presiza nafatin profisionalizasaun, modernizasaun, no koordenasaun inter-institusionál ne’ebé boot liu atu bele hatán ho efetivu ba ezijénsia sira integrasaun rejionál nian. Menus rekursu umanu kualifikadu no dependénsia ba asisténsia téknika externa hamosu mós obstákulu ba estadu nia abilidade atu kumpre kompromisu multilaterál sira.

3.2. Kompetitividade ne’ebé limitadu

Timor-Leste nia kompetividade limitadu reprezenta obstákulu prinsipál ida ba nia integrasaun tomak iha ASEAN. Maski T-L iha potensiál signifikativu iha rekursu naturál sira, agrikultura, turizmu, no forsa traballu foin-sa’e nian ne’ebé ativu, ambiente ekonómiku hasoru nafatin limitasaun estruturál sira ne’ebé maka kompromete nia abilidade atu kompete hanesan ho membru sira seluk husi bloku rejionál.

Tuir Fórum Ekonómiku Mundiál nia Relatóriu Kompetitividade Globál (2023), Timor-Leste entre ekonomia sira ne’ebé menus kompetitivu iha Sudeste Aziátiku, tanba fatór sira hanesan produtividade laborál ne’ebé ki’ik, infraestrutura ne’ebé ladi’ak, dependénsia ba importasaun, no dezenvolvimentu setór privadu ne’ebé limitadu. Ekonomia Timor nian domina husi empreza ki’ik no médiu ho asesu limitadu ba finansiamentu, teknolojia, no merkadu internasionál, ne’ebé difikulta sira-nia integrasaun iha kadeia valór rejionál ASEAN nian.

Aleinde ne’e, kustu transporte no lojístika ne’ebé aas, kombina ho ligasaun marítima no aérea ne’ebé limitadu, aumenta folin produtu sira no hamenus sira nia atrasaun ba investidór estranjeiru sira. Falta baze industriál ne’ebé diversifikadu no dependénsia maka’as ba setór públiku nu’udar empregadór prinsipál mós restrinje dinamizmu merkadu doméstiku no ninia kapasidade ba inovasaun.

Fatór seluk ne ebé afeta Timor-Leste nia kompetividade mak nivel kualifikasaun forsa traballu nian. Sistema edukasionál no tékniku-profisionál sira sei dezenvolve hela, no joven barak laiha formasaun adekuadu atu hatán ba ezijénsia sira merkadu rejionál nian. Ida-ne’e kria deskorespondénsia entre oferta traballadór no nesesidade sira husi setór produtivu, hodi hamenus nasaun nia potensiál atu atrai investimentu ho eskala boot.

Aliende ne’e, limitasaun teknolójika no dijitalizasaun fraku husi ekonomia konstitui barreira sira ba integrasaun iha rede komérsiu no finanseira modernu sira. Falta polítika inovasaun no empreendedorizmu ne’ebé konsistente agrava situasaun ida-ne’e, hodi halo nasaun ne’e sai menus kompetitivu kompara ho ekonomia sira ne’ebé avansadu liu iha rejiaun, hanesan Singapura, Malázia, no Tailándia.

Tanba ne’e, adezaun iha ASEAN, enkuantu lori oportunidade dezenvolvimentu, espoin mós Timor-Leste ba kompetisaun direta ho ekonomia sira ne’ebé estruturadu liu. La ho polítika sira ne’ebé efetivu atu hametin setór produtivu, diversifika ekonomia, no investe iha kapitál umanu, nasaun ne’e iha risku atu hetan benefísiu sira rejionál nian.

4. Perspetiva sira ba futuru

Timor-Leste nia adezaun ba Asosiasaun Nasaun  Sudeste Aziátiku nian (ASEAN) reprezenta la’ós de’it marku istóriku ida iha polítika esterna nasaun nian, maibé mós oportunidade estratéjiku ida hodi planeia nia dezenvolvimentu ba tempu naruk. Integrasaun ne’e nia perspetiva futuru iha ligasaun maka’as ba estadu Timor nia abilidade atu promove reforma estrutural, hametin instituisaun públika sira, no kria ambiente ne’ebé favoravel ba kooperasaun ekonómika, polítika, no sosiál iha bloku rejionál nia laran.

Primeiru, ASEAN oferese ba Timor-Leste enkuadramentu institusionál ida ba apoiu no kooperasaun téknika ne’ebé bele aselera prosesu modernizasaun administrativa, armonizasaun polítika públika, no hadi’a governasaun. Partisipasaun ativu iha enkontru ministeriál sira no plataforma kooperasaun rejionál sira sei permite T-L atu hetan esperiénsia no prátika di’ak liu iha jestaun, planeamentu, no diplomasia multilaterál, nune’e hametin ninia pozisaun iha palku internasionál.

Haree hosi perspetiva ekonómika, perspetiva pozitivu karik governu konsege implementa estratéjia diversifikasaun ekonómika, hamenus dependénsia ba petróleu no investe iha setór sira hanesan agrikultura sustentável, turizmu, peska, indústria, no ekonomia dijitál. Integrasaun iha merkadu komún ASEAN nian bele atrai investimentu estranjeiru foun, fasilita asesu ba kadeia valór rejionál sira, no kria empregu ba populasaun joven Timor-Leste nian.

Timor-Leste nia adezaun iha futuru iha ASEAN sei depende ba hametin nia kapitál umanu no infraestrutura nasionál. Investimentu iha edukasaun, formasaun téknika, no inovasaun teknolójiku sei esensiál atu hasa’e produtividade no hasa’e kompetividade nasaun nian. Kooperasaun ho parseiru rejionál sira bele apoia programa formasaun, transferénsia teknolojia, no finansiamentu ba projetu dezenvolvimentu sustentável.

Iha arena polítika no diplomátika, Timor-Leste iha oportunidade atu estabelese-an nu’udar atór ativu no konstrutivu iha promosaun pás, seguransa, no direitus umanus iha Sudeste Aziátiku. Tradisaun diálogu, solidariedade, no kompromisu ba valór demokrátiku sira bele kontribui ho pozitivu ba ekilíbriu polítiku rejiaun nian, hodi hametin mós nasaun nia imajen internasionál. 

5. Konklusaun

Timor-Leste nia adezaun ba ASEAN konstitui pasu istóriku no estratéjiku iha prosesu konsolidasaun ninia identidade polítika, ekonómika, no diplomátika iha kontestu rejionál no internasionál. Prosesu ida-ne’e reprezenta la’ós de’it realizasaun simbóliku ida ba nasaun joven, maibé mós oportunidade konkreta ida atu promove dezenvolvimentu sustentável, kooperasaun, no estabilidade rejionál.

Husi perspetiva pró no kontra, integrasaun ASEAN oferese ba Timor-Leste plataforma sólidu ida ba kooperasaun polítika, ekonómika, no kulturál, hodi permite hametin relasaun diplomátika no aumenta prestíjiu internasionál. Adezaun mós loke odamatan ba oportunidade foun sira komérsiu no investimentu nian, hodi permite nasaun diversifika nia ekonomia, hamenus dependénsia ba setór petrolíferu, no integra iha kadeia valór rejionál sira. Liután, ASEAN bele sai nu’udar mekanizmu apoiu tékniku no institusionál ne’ebé importante, hodi fasilita modernizasaun administrativa, hametin governasaun públika, no promove pás no seguransa iha Sudeste Aziátiku.

Iha parte seluk, desvantajen sira no dezafiu sira hanesan signifikativu. Timor-Leste hasoru nafatin frakeza estruturál sira iha nivel ekonómiku, institusionál, no umanu, ne’ebé limita ninia abilidade atu hatán tomak ba ezijénsia sira integrasaun rejionál nian. Kompetitividade ne’ebé ki’ik, dependénsia ba importasaun, limitasaun infraestrutura, no falta traballadór kualifikadu tau nasaun ne’e iha desvantajen kompara ho ekonomia ASEAN ne’ebé dezenvolvidu liu. Aleinde ne’e, adaptasaun ba padraun no kompromisu rejionál sira sei presiza tempu, rekursu sira, no jestaun públika ne’ebé efisiente.

Maibé, labele haree dezafiu sira-ne’e nu’udar obstákulu ne’ebé labele ultrapasa, maibé haree nu’udar insentivu ba fortalesimentu internu estadu no sosiedade timoroan nian. Adezaun ba ASEAN bele sai hanesan katalizadór ba reforma profundu iha área ekonomia, edukasaun, administrasaun públika, no kooperasaun internasionál. Ho vizaun estratéjiku ba tempu naruk, nasaun bele transforma frakeza atuál sira ba oportunidade ba kreximentu no konsolidasaun institusionál.

Konklui katak, Timor-Leste nia adezaun ba ASEAN hanesan pasu ida ne’ebé inevitavel no nesesáriu ba ninia integrasaun tomak iha sistema rejionál no globál. Susesu husi viajen ida ne’e sei depende ba kompromisu estadu nian atu investe iha kapasitasaun institusionál, diversifikasaun ekonómika, no inkluzaun sosiál. Karik alkansa objetivu sira ne’e, Timor-Leste sei la’ós de’it partisipa ativu iha ASEAN, maibé sei kontribui mós ba hametin komunidade rejionál ida ne’ebé justu liu, apoiante no dezenvolvidu liu.