KOVALIMA, 07 Outubru 2025 (TATOLI)-Vise Delegasaun ekipa munisípiu Bobonaru, Mario Soares, relata jogadór hosi modalidade haat daudaun ne’e to’o ona iha munisípiu Kovalima hodi partisipa kompetisaun jogu desportivu fronteira 2025 ne’ebé realiza iha ámbitu festivál fronteira iha Kovalima.
Jogu desportivu fronteira 2025 ne’e ho tema “ Hametin amizade, paz no estabilidade liuhosi jogu desportu” ne’ebé hala’o ona loron 06 to’o 11 fulan-Outubru tinan ida ne’e.
Modalidade haat ne’e maka futeból, Voleiból, Basketból, atletismu, Korrido Kavalo ho ninia objetivu hodi hametin relasaun foinsa’e sira iha aréa fronteira hanesan Kovalima, Bobonaro, RAEOA.
“Ita hotu hatene tuir Ministériu Juventude Desportu Arte no Kultura (MJDAK) jogadór sira ne’ebé maka atu partisipa iha kompetisaun desportu fronteira maka hanesan deportu ho modalidade voleiból, basket, futsál, no maratona,” nia informa ba TATOLI, iha Aidila-Laran Kovalima, ohin.
Delegasaun hosi munisípiu Bobonaro hamutuk ema na’in-68 kompostu hosi jogadór, treinadór, ofisiál treinadór no seluk tan maka daudaun ne’e to’o ona iha munisípiu Kovalima hodi partisipa jogu fronteira ne’e.
Maske jogu ne’e la’o ona, maibé tuir ninia observasaun nota komisaun ne’ebé organiza jogu desportivu fronteira ne’e foin maka atu kesi rede voleiból nian ho tali nomos foin maka distribui uniforme ba jogadór sira.
“Ha’u rasik iha esperénsia envolve ona iha atividade fronteira cup ba datoluk ona maibé eventu festivál fronteira ba datoluk organiza ladun di’ak tanba komisaun organizadora halo preparasaun ladun másimu,”nia observa.
Hosi modalidade voleiból nian ekipa feto hosi Bobonaro VS ekipa feto hosi Kovalima, tersa ne’e, no rezultadu hatudu ekipa bobonaro hallakon kovalima ho valór 2-0 tanba hosi primeiru jogu ekipa Bobonaro hetan pontu 25 no Kovalima 23, no segundu jogu Bobonaro hetan pontu 25 no Kovalima 9.
No tuir oráriu ohin, ekipa voleiból mane hosi Bobonaru sei joga hasoru ekipa mane hosi RAEOA ne’ebé hala’o iha kampu Salele postu administrativeuTilomar.
Prezidente Interinu Konfederasaun Desportu Munisípiu Kovalima, Almerio Gusmão hateten, hosi modalidade haat ne’e, hafoin halo abertura hahú ona joga tanba eventu desportiva ne’e sei ensera iha loron 11 fulan-Outubru 2025.
“Kompetisaun desportu hafoin abertura kada modalidade ida-idak organiza malu hodi hala’o kompetisaun ne’ebé hahú iha loron 6 to’o loron 11 Outobru ne’ebé maka ohin jogadór feto husi Bobonaru kompete ho ita munisípiu Kovalima rasik,”nia dehan.
Festivál fronteira tinan 2025 ne’ebé hala’o iha munisípiu Kovalima ne’e ho ninia orsamentu hamutuk USD 216.414.00 maihosi Ministériu Juventude Desportu Arte no Kultura (MJDAK) no Sentru Nasionál Chega (CNC-sigla portugés).
Jornalista:Celestina Teles
Editór:Florencio Miranda Ximenes
