DILI, 28 Outubru 2025 – Embaixadór Ukránia nian iha Malázia, Hennadii Nadolenko, hato’o ona parabéns ba Prezidente-Repúblika, José Ramos-Horta, ba adezaun istóriku nasaun nian ba Asosiasaun Nasaun sira Sudeste Aziátiku nian (ASEAN, sigla inglés) nu’udar membru plenu.
Iha nia karta ofisiál ne’ebé dirije ba Xefe Estadu, José Ramos-Horta, Embaixadór Hennadii Nadolenko elojia realizasaun ne’e nu’udar marku boot ida ba Timor-Leste no ba rejiaun ne’ebé luan liu.
“Horisehik, Timor-Leste adere ba ASEAN no sai nu’udar membru plenu ba dala-11 husi organizasaun ne’e. Pasu istóriku ida-ne’e loke oportunidade estratéjiku lubuk ida ba nasaun joven ida ne’e, husi integrasaun kle’an liu iha prosesu ekonómiku rejionál sira no partisipasaun iha programa dezenvolvimentu prinsipál Sudeste Aziátiku nian, hodi asesu ba merkadu úniku ida ne’ebé luan ho ema liu millaun 600,” Embaixadór Hennadii Nadolenko informa liuhusi nota imprensa ne’ebé TATOLI asesa, kuarta ne’e.
“Sei fó dalan ba Timor-Leste atu atrai investimentu no teknolojia foun sira, dezenvolve nia infraestrutura no indústria emerjente sira, no hola papél ida ne’ebé ativu liu iha kooperasaun seguransa rejionál no diálogu diplomátiku. Adezaun ba ASEAN sei ajuda habelar interkámbiu kulturál no edukasionál sira iha família ASEAN nia laran, hametin kompreensaun mútua no solididade iha rejiaun tomak,” refere nota imprensa ne’e.
Embaixadór deskreve, adezaun Timor-Leste nian hanesan símbolu unidade no inkluzividade ASEAN nian ne’ebé buras daudaun, hodi hatutan katak nia iha onra atu fó parabéns pesoalmente ba Primeiru-Ministru Kay Rala Xanana Gusmão ba realizasaun signifikativu ida-ne’e no hodi hato’o saudasaun sinseru sira hosi lideransa Ukránia nian.
Embaixadór Hennadii Nadolenko nota katak dezenvolvimentu relasaun bilaterál ho Timor-Leste, nu’udar membru ASEAN foun liu, oferese oportunidade foun ba Ukránia atu hasa’e kooperasaun iha Sudeste Aziátiku.
Nia mós subliña katak Ukránia no Timor-Leste fahe buat barak ne’ebé hanesan iha sira-nia esperiénsia no aspirasaun istóriku sira.
“Ita-nia nasaun rua ne’e la’o ona iha dalan dezafiante sira ba independénsia no liberdade. Hanesan Ukránia aspira atu sai membru plenu Uniaun Europeia nian, ita komprende no apoia viajen Timor-Leste nian iha ASEAN nia laran,” nia hateten.
“Ukránia valoriza tebes ninia amizade ho Timor-Leste no prontu atu fahe ninia esperiénsia iha área sira hanesan seguransa ai-han, dijitalizasaun no siberseguransa, ne’ebé importante tebes ba dezenvolvimentu nasionál sustentável.”
Embaixadór Nadolenko revela katak Embaixada Ukránia nian iha Malázia buka hela rezidente Timor-Leste ida ne’ebé koñesidu no respeitadu ne’ebé dedikadu atu dezenvolve relasaun Ukránia-Timor ne’ebé fó benefísiu ba malu, B2B no ligasaun ema-ba-ema atu hetan nomeasaun nu’udar Konsuladu Onoráriu Ukránia nian iha Timor-Leste.
Ukránia haree Timor-Leste la’ós de’it hanesan nasaun belun ida ne’ebé fahe valór sira hanesan kona-ba liberdade no independénsia ho Ukránia, maibé mós hanesan odamatan ida ba Pasífiku.
Nia mós fó-sai ninia intensaun atu aprezenta ninia Karta Kredensiál sira ba Prezidente José Ramos-Horta iha tempu badak no atu vizita Timor-Leste “hodi hametin liután amizade no esplora dalan foun sira kooperasaun nian.”
“Ha’u dezeja ba povu Timor-Leste prosperidade no futuru ne’ebé nabilan nu’udar membru kompletu família ASEAN nian. Ukránia prontu atu servisu besik ho ita-boot sira-nia nasaun hodi promove pás, estabilidade no dezenvolvimentu sustentável iha ita-nia rejiaun sira,” Embaixadór konklui.
TATOLI
