DILI, 14 Outubru 2025 (TATOLI)—Sekretáriu Estadu Asuntu Toponímia no Organizasaun Urbana, Germano Santa Brites, hateten Sekretaria Estadu Asuntu Toponímia no Organizasaun Urbana (SEATOU) iha fulan ne’e nia laran sei uma-kain besik 200 iha Ministériu Finansa nian, Aitarak-Laran no uma-kain besik 50 iha Embaixada Korea nia kotuk ka Masjid Kampung-Alor nia oin.
“Uma-kain hirak-ne’e ita sei hasai hodi Governu halo fali buat seluk iha-ne’ebá. Tempu mak ita hein hela liña kordenasaun ho Ministériu Justisa, Ministériu Obra Públika no mós Ministériu Administrasaun Estatál. Tempu sobu ne’e mak iha Outobru nian laran ne’e,” Brites dehan ba jornalista sira iha resintu F-FDTL, Fatuhada, Dili, Tersa ne’e.
Nia mós hateten alargamentu espasu iha Aitarak-Laran ka iha Ministériu Finansa nia kotuk ne’e sei hein hela despaxu husi Ministériu Justisa.
“Agora ita hein hela despaxu. Besik ona tama tempu udan ne’ebé ita mós haree hela kondisaun ida-ne’e. Ita mós tenke tetu hodi maluk sira iha-ne’ebá ne’e labele sai fali vítima ba dezastre naturál,” Germano informa.
Jornalista: Osória Marques
Editór: Xisto Freitas da Piedade
