DILI, 06 Outubru 2025 (TATOLI)-Sekretaria Estadu Kooperativa (SEKoop) ezekuta ona 67,24% husi Orsamentu Jerál Estadu (OJE) 2025 husi montante alokadu hamutuk millaun $6.
Diretór-Jerál SEKoop, Olderico Lopes, hateten orsamentu ne’ebé prevee ne’e fahe ba kategoria saláriu no vensimentu millaun $2,2, bens no serbisu millaun $1,9, transferénsia públika millaun $1,8 no kapitál menór rihun $100.
“Husi Janeiru to’o 03 Outubru 2025 ita ezekuta 67,24% ekivalente ba millaun $4-resin. Husi orsamentu ne’e ita ezekuta boot lsiu mak tranferénsia públika, tanba ita halo tranferénsia orsamentu ba kooperativa sira no tuir mak saláriu no vensimentu”, Olderico Lopes dehan ba Tatoli, ohin.
Ezekusaun orsamentu ne’e la’o tuir planu no prioridade ne’ebé iha, maibé dezafiu ne’ebé iha mak atu fó formasaun ba kooperativa dalaruma ekipa to’o fatin kooperativa sira laiha fatin, enkuantu nafatin halo esforsu no daudaun kooperativa barak mak iha mudansa.
Tuir Olderico Lopes, SEKoop iha mandatu Governu dasiak nian, nu’udar instituisaun ne’ebé tutela ba iha Vise-Primeiru-Ministru no Ministru Koordenadór ba Asuntu Ekonómiku (MKAE) ho ninia papél importante mak atu fó apoiu ba dezenvolvimentu ekonomia família no komunidade nian, liuhusi estabelesimentu, halo promosaun ba merkadu no akompaña movimentu kooperativa, inklui empreza sira mikro, ki’ik no médiu (MSME) iha Timor-Leste.
“Husi esforsu sira ne’ebé iha apoiu ba movimentu kooperativa no estabelesimentu federasaun multi kooperativa sira, ita iha kooperativa primária hamutuk 248, ho ema hamutuk rihun 39 no kapitál akumuladu ho totál millaun $20,6 no estabelesimentu Federasaun Kooperativa iha munisípiu 12 inklui Oekusi”, informa.
Nia esplika kataj husi alokasaun orsamentu ne’e iha parte subvensaun públika apoia ona benefisiáriu hamutuk grupu 10, asosiasaun, fundasaun no kooperativa ho totál ema na’in- 138.218, kuaze 10% husi totál populasaun Timor-Leste nian.
Nia dehan ezekusaun kontinua la’o tuir planu no prioridade ne’ebé iha no fiar katak to’o tinan ne’e nia rohan SEKoop sei ezekuta hotu orsamentu ne’e ho di’ak hodi atinje 100%.
Notísia relevante: SeKoop kontinua monitoriza no kapasita kooperativa iha Baukau
Jornalista: Arminda Fonseca
Editora: Maria Auxiliadora
