DILI, 03 Outubru 2025 (TATOLI)—Sekretaria Estadu Kooperativa (SeKoop) kontinua implementa programa no atividade sira hanesan monitoriza no kapasita setór kooperativa iha Munisípiu Baukau.
Koordenadór Serbisu Delegasaun SeKoop Munisípiu Baukau, Domingos Ximenes esplika atividade sira-ne’e bazeia ba planu programa no orientasaun husi nasionál ho objetivu atu halo akompañamentu, hasa’e koñesimentu no fó akonselamentu ba grupu kooperativa sira ho objetivu hasa’e produsaun iha multi-setorál no krexe finanseira ba kooperativa Credit Union.
“Ida-ne’e kna’ar no devér ami-nian iha Baukau hanesan formasaun bázika inklui halo akonselamentu perante ho setór kooperativa iha Baukau,” Koordenadór Delegasaun SeKoop Munisípiu Baukau informa ba TATOLI liuhosi telefónema, Kinta ne’e.
Domingos relata programa kapasitasaun implementa liuhosi atividade formasaun, edukasun no informasaun liuliu foku ba transformasaun inklui motiva sosiedade atu aumenta estabelese kooperativa hanesan harii setór multi grau kooperativa iha Baukau.
Programa monitorizasaun ne’ebé halo foku ba setór kooperativa produsaun hanesan fehuk, fore-rai no produtu prima husi SeKoop Bafo Kay Rala ne’ebé serbisu hamutuk ho parseiru movimentu kamponeza.
“Trimestrál ikus tinan ne’e ita kontinua halo akompañamentu ba setór produsaun hahú husi apoia fini, kolleta to’o distribusaun,” Domingos akresenta.
Tuir dadus, totál kooperativa iha munisípiu Baukau hamutuk 20 kompostu Credit Union 14 no multi-setorál neen. Husi númeru ne’e haat mak legalizadu kompostu Credit Union rua no multi-setorál rua, enkuantu 16 seluk iha faze kualifikasaun.
Entretantu, totál funsionáriu SeKoop iha Munisípiu Baukau hamutuk na’in-16 kompostu feto na’in-hitu no mane-sia hanesan ajente administrativu no kontratadu ne’ebé koloka tarefa serbisu ba postu administrativu inklui suku iha Munisípiu Baukau.
Jornalista: Natalino Belo
Editór: Xisto Freitas da Piedade
