DILI, 30 Outubru 2025 (TATOLI) – Ministériu Komérsiu no Indústria (MKI) asina kontratu ho empreza lima ho nia konsórsiu sira atu halo supervizaun ba konstrusaun Merkadu Munisipál Lautein, Ermera, Sentru Nasionál Inkubasaun foun Dili, no halo estudu viabilidade ba Merkadu Manleuana no Taibesi.
Empreza lima ne’ebé asina kontratu ho MKI mak hanesan PT. Kanta Karya Utama (Indonézia) konsórsiu ho Jenetbu Gumer Unipessoal Lda. ne’ebé sei halo supervizaun ba konstrusaun Merkadu foun Munisipál Lautein, PT. Bennatin Surya Cipta (Indonézia) joint venture ho empreza Rachio Plan Consultant Lda. sei halo supervizaun ba konstrusaun Merkadu Munisipál foun Ermera.
Nune’e, PT. Ciriajasa Engineering Consultant (Indonézia) konsórsiu ho PT. Pola Teknik Konsultan (Indonézia) no Kai Watu Kmanek Consultant, Unipessoal Lda. (Timor-Leste) sei halo supervizaun ba konstrusaun Sentru Nasionál Inkubasaun foun.
Estudu viabilidade ba konstrusaun Sentru Komérsiu foun Taibesi mak sei halo husi PT. Multi Karadiguna Jasa (Indonézia), konsórsiu ho empreza Salu Corporation Unipessoal Lda. no PT. Laminar Engineering Consultant (Indonézia).
Ba estudu viabilidade ba konstrusaun Sentru Komérsiu foun Manleuana, kaer husi PT. Metaforma Consultants (Indonézia), konsórsiu ho empreza Arcplen Consultant Unipessoal Lda,.
Iha biban ne’e, Ministru Komérsiu no Indústria, Filipus Nino Pereira, husu ba emprezáriu sira aproveita didi’ak konfiansa ne’ebé Governu fó, tanba liuhusi avaliasaun lubuk ida mak hetan oportunidade ne’e.
“Ha’u husu empreza manán-na’in sira tenke hala’o serbisu ho di’ak, tanba ita hakarak iha infrastrutura ne’ebé kualidade, no tuir duni padraun ne’ebé ita iha. Entaun, ita la’ós asegura de’it prosesu administrativu nian, maibé mós halo akompañamentu atu garante ninia kualidade”, dehan.
Governante ne’e iha esperansa katak serbisu hamutuk sei garante kualidade no terminasaun husi projetu ne’e rasik.
“Ami haree katak ita-boot sira-nia akompañamentu ba supervizaun ne’e nafatin iha koordenasaun tantu ba empreza sira ne’ebé sei implementa konstrusaun ba projetu sira ne’e rasik. Ba estudu viabilidade merkadu Taibesi no Manleuana ita hakarak halo tanba haree ba tipu negósiu ne’e aumenta, entaun presiza halo sai hanesan sentru komersiál”, nia dehan.
Diretór Nasionál Komérsiu Internu, Gabriel da Costa, esplika supervizaun ba merkadu Lautein ho nia totál orsamentu hamutuk rihun $450, Ermera rihun $460, Sentru Inkubasaun Dili hamutuk rihun $298.
Kona-ba estudu viabilidade ba merkadu rua ne’e Manleuana rihun $215 no Taibesi hamutuk rihun $241.
“Prosesu ba supervizaun rasik presiza tempu, tinan rua resin tanba sira akompaña ba kualidade konstrusaun nian, no estudu viabilidade ba Merkadu Manleuana no Taibesi durasaun fulan haat, tanba sira sei halo análize ekonomia, estudu ba rai no seluk tan hodi garante viavel ka la’e, hakat ba konstrusaun nian”, nia adianta.
Ba supervizaunMerkadu Munisipál Baukau seidauk bele asina kontratu tanba empreza manán-na’in seidauk submete dokumentu ba Komisaun Nasionál Aprovizionamentu.
Diretór Empreza Arceplen Consultant Unipessoa, Lda, Agostinho Simões, hateten nia parte agradese ba konfiansa ne’ebé Governu fó atu halo estudu viabilidade ba Merkadu Manleuana.
“Durante fulan haat ami garante sei finaliza estudu ne’e ho di’ak, tanba ita-nia foku ne’e sei haree ba merkadu ne’e viavel ka la’e atu konstrui foun iha futuru”, nia konklui.
Notísia relevante: Juñu, MKI loke konkursu ba konstrusaun merkadu tolu iha munisípiu
Jornalista: Arminda Fonseca
Editora: Maria Auxiliadora
