DILI, 01 Novembru 2025 (TATOLI) –Ministru Defeza Timor-Leste no Ministru Defeza Malázia asina akordu kooperasaun militár hafoin Timor-Leste nia adezaun ba Asosiasaun Nasaun sira iha Sudeste Aziátiku (ASEAN, sigla portugés).
Ministru Defeza Timor-Leste Kontra-Almirante Donaciano do Rosário da Costa Gomes “Pedro Klamar Fuik”, hamutuk ho Ministru Defeza Malázia Datuk Seri Mohamed Khaled Nordin asina nota entedimentu hodi haforsa kooperasaun biliterál Timor-Leste no Malázia iha domíniu Defeza nian.
Nota kooperasaun ne’ebé mak Ministru Defeza Timor-Leste Kontra-Almirante Donaciano do Rosário da Costa Gomes “Pedro Klamar Fuik”, ho nia omólogu Ministru Defeza Malázia Datuk Seri Mohamed Khaled Nordin asina ne’e foka liu ba iha instrumentu jurídiku iha domíniu Defeza nian ne’ebé foka ba asuntu haat ne’ebé mak TATOLI asesa liuhusi nota imprensa; diálogu no estratejia regulár, reforsa kapasidade F-FDTL no forsa Malázia, oinsá militár rai rua ne’e hametin kooperasaun iha área domíniu defeza nian liuhusi interkámbiu, siénsia teknolojia no indústria defeza.
Akordu kooperasaun entre Timor-Leste no Malázia iha área Defeza asina hafoin reuniaun Ministru Defeza ASEAN nian ba dala-19 ne’ebé halao iha Kuala Lumpur Malázia sesta (31/10).
Ho nune’e, kooperasaun bilaterál entre Timor-Leste no Malázia iha domíniu defeza ne’ebé foku ba instrumentu jurídiku ne’e reflete ba iha ba polítika kooperasaun Timor-Leste nian.
Kooperasaun ne’ebé mak Ministru Defeza Timor-Leste Kontra-Almirante Donaciano do Rosário da Costa Gomes “Pedro Klamar Fuik”, ho nia omólogu Ministru Defeza Malázia Datuk Seri Mohamed Khaled Nordin nu’udar kooperasaun dahuluk iha dominiu Defeza nian , hafoin Timor-Leste sai membru plenu direitu ba ASEAN foin lalais ne’e.
TATOLI
