DILI, 05 Outubru 2025 (TATOLI) – Reprezentante Povu iha uma fukun Parlamentu Nasionál, hateten Timor-Leste adere ona ba Asosiasaun Nasaun sira iha Sudeste Aziátiku (ASEAN, sigla inglés), tanba ne’e presiza governasaun ida efisiente no ekonomia kompetetiva.
Deputadu CNRT, Saul Salvador, hateten adezaun país ba ASEAN reprezenta marku foun ida no ezije governasaun efisiente no ekonomia ne’ebé kompetitiva.
Nia hato’o apresiasaun entidade hotu nia serbisu hamutuk no parabeniza ba povu Timor-Leste ba adezaun ofisiál país nian iha organizasaun rejionál ne’e.
“Adezaun ida-ne’e, reprezenta marku ida no palku foun ida ba ita-nia rai, iha palku rejionál no internasionál. Adezaun iha ASEAN ezije governasaun ne’ebé efisiente no ekonomia ida ne’ebé kompetitiva, no instituisaun públika sira ne’ebé forte, objetivu sira ne’ebé reflete ona iha Orsamentu Jerál Estadu 2026 no tenke kontinua hala’o iha tinan hirak tuir mai’,” nia hato’o iha diskusaun proposta Orsamentu Jerál Estadu (OJE) 2026 faze jeneralidade loron dahuluk iha Parlamentu, kinta ne’e.
Nia hateten. Governu ida-ne’e fiar katak país nia adezaun ba ASEAN sei hasa’e liután kresimentu ekonómiku rai-laran, hametin turizmu, investimentu estranjeiru no konfiansa investidór sira nian.
“Timór nia adezaun ba ASEAN, loke ona asesu ba merkadu rejionál, ida-ne’ebé luan no promove empregu, enkuantu reforma sira ne’ebé la’o hela ba futuru Banku Nasionál Dezenvolvimentu Timor-Leste sei ajuda diversifika ekonomia nasionál’,” nia dehan.
Deputadu FRETILIN, Aniceto Guterres, sujere proposta OJE prioriza alokasaun diversifikasaun ekonomia liliu apoiu setór privadu, agrikultor ki’ik bele aproveita oportunidade merkadu rejionál ASEAN.
Deputadu KHUNTO, Antonio Verdiál de Sousa, husu Governu garante seguransa jurídika liuliu títulu rai nune’e fasilita investidór sira mai investimentu iha rai-laran, tanba país sai ona membru ASEAN.
Notísia relevante : https://tatoli.tl/2025/10/30/ramos-horta-no-xanana-diskute-asesu-ba-oportunidade-iha-asean/
Jornalista: Nelson de Sousa
Editór : Evaristo Soares Martins
