DILI, 30 Outubru 2025 (TATOLI)-Prezidente Repúblika (PR), José Ramos-Horta, no Primeiru Ministru (PM), Xanana Gusmão, aborda preparasaun país nian atu asesu ba oportunidade sira iha Asosiasaun Nasaun Sudeste Aziátiku (ASEAN, siglá portugés), liuliu iha setór ekonómiku.
Xefe Governu dehan tama ASEAN nu’udar oportunidade, maibé responsabilidade boot iha preparasaun interna atu partisipa hodi bele aproveita oportunidade sira ne’e.
“Ohin, ami ko’alia liu kona-ba ita-nia preparasaun. Uluk nu’udar observadór, ita bá rona, depois ita halo komentáriu ruma. Foin mak ita tama, ne’ebé ita la dehan ladún iha oportunidade atu ko’alia buat barak”, Xanana hateten hafoin ramata enkontru semanál iha Palásiu Prezidensiál, Aitarak-Laran, ohin,
Primeiru-Ministru hateten tanba agora país sai ona membru no bainhira bá fali Simeira seluk, tenke buka oinsá haree daudaun ona oportunidade hodi liga ho rai sira seluk.
“Hodi dehan oportunidade saida mak imi fó atu ita aproveita iha área hotu-hotu, liuliu iha ekonomia, setór sosiál no área barabarak. Ida-ne’e mak ami rua ko’alia filafali”, nia relata.
Lembra katak, iha 26 Outubru, iha Kuala Lumpur-Malázia, iha Simeira ASEAN ba da-47, Timor-Leste adere formalmente sai membru ASEAN ba da-11.
Notísia relevante: https://tatoli.tl/2025/10/29/xanana-tama-asean-sai-oportunidade-no-responsabilidade-boot-ba-timor-leste/
Jornalista: Nelson de Sousa
Editora: Maria Auxiliadora
