DILI, 06 Novembru 2025 (TATOLI) – Primeiru-Ministru, Kay Xanana Gusmão, hateten tinan 2026 nu’udar teste ba munisípiu sira ne’ebé preparadu ona sei hakat ba eleisaun kámara munisipál.
“Ami hanoin hela, buat ida uluk kedas hanoin desentralizasaun, foin dadaun ne’e book oituan prepara, tinan 2026 ha’u sei lao haleu fali Timor tomak, hodi haree ajuda iha munisipiu sira oinsá, ne’e mak hanoin hela iha 2027 bele iha eleisaun balun, la’ós iha fatin hotu, bainhira iha munisípiu sira preparadu iha buat rua; funsionáriu ne’ebé serbisu iha-ne’eba, administrasaun, finansa, planeamentu ho enjeñeiru hodi sira mak halo programa, ne’e mak ita entrega ona daudaun buat balun, kurrize halo ladi’ak hadi’a, bainhira preparadu ona bele fó, tanba ne’e tinan 2026 hanesan ezame no teste ida ba sira,” Xanana hato’o iha debate proposta Orsamentu Jerál Estadu (OJE) 2026 faze jeneralidade loron daruak iha Parlamentu, kinta ne’e.
Nune’e iha 2027 munisípiu ne’ebé preparadu ona sei hakat ba eleisaun. “Ba munisípiu nia oan preparadu ona, sira bele hetan eleisaun asembleia munisipál, tanba sira iha-ne’ebá sei kontrola daudaun ona, iha-ne’eba bainhira halo orsamentu ida iha munisípiu, postu, suku ida tur iha-ne’ebá hodi deside hamutuk.”
Hodi salienta, nune’e atu haree prioridade iha ne’ebé urjénsia liu iha baze tuir nesesidade povu. “Iha-ne’e, sira mós apriende, katak ukun-an ne’e ukun husi sira rasik, tanba hakbesik Governu ba Povu ne’e nu’u nu’udar forma di’akliu bá Povu, Governu lokál,” nia hateten.
Iha relatóriu no pareser Komisaun C Asuntu Finansa Públika ba proposta OJE 2026 rekomenda Governu atu konsolida kapasidade téknika no desentralizasaun.
Tanba ezekusaun polítika públika sira ne’ebé efetivu presiza hametin kapasidade téknika no jestaun nian iha nível lokál, nune’e mós konsolida mekanizmu desentralizasaun administrativa no finanseira, hodi hakbesik serbisu públiku sira ba sidadaun sira.
Komisaun nota proposta OJE 2026 ba autoridade munisípiu sira refora prosesu desentralizasaun, ho aumenta 12,2% orsamentu ba dotasaun munisípiu sira, millaun $123,6 iha 2025 ba millaun $138,6 iha tinan oin.
“Evolusaun orsamentál ne’e fortalese autonomia finanseira lokál no mellora prezibilidade iha ezekusaun despeza korente no investimentu’’, refere relatóriu komisaun C.
Notísia relevante : Munisípiu Aileu otimista hakat ba Kámara Munisipál iha tinan-2026
Jornalista: Nelson de Sousa
Editór : Evaristo Soares Martins
