DILI, 06 Novembru 2025 (TATOLI)–Prezidente Repúblika, José Ramos-Horta husu ba Federasaun Siklizmu Timor-Leste (FSTL) no Federasaun Atletizmu Timor-Leste (FATL) atu hahú prepara-aan hodi realiza hikas Tour Timor sei hahú husi Indonézia no Dili Internasionál Maratona iha Dili ne’ebé sei realiza iha fulan-Agostu tinan 2026.
Notísia Relevante: Dili Internasionál Maratona “Halai ba Palestina” atu promove pás
Prezidente Federasaun Atletizmu Timor-Leste (FATL), Afrânio Xavier Amaral, hateten orientasaun Xefe Estadu nian klaru hodi husu ba federasaun rua atu hahú halo preparasaun másimu hodi realiza eventu internasionál rua ne’e iha tinan oin.
“Ami simu konvite ofisiál husi Xefe Estadu, ne’e mak ami hasoru malu ho Prezidente, nia husu ami atu prepara hela programa ne’ebé atu determina data fiksu no la muda, ne’ebé sei monu iha semana daruak fulan-Agostu tinan 2026. Ne’ebé, ami sei hala’o iha Timor-Leste,” Afrânio hateten ba jornalista sira iha Palásiu Prezidensiál Nicolau Lobato, Bairru Pite.
Nia dehan, eventu rua ne’e hala’o sei kolabora hamutuk ho federasaun nasaun sira ASEAN nian no federasaun mundiál hodi organiza hamutuk.
“Dili Maratona sai hanesan eventu internasionál ida iha kalendáriu, hanesan atividade sira iha mundu tomak, entaun ita sei kolabora ho federasaun sira iha nasaun ASEAN nian no mundiál atu haree hamutuk,” nia dehan.
Nia hateten, ema hotu bele partisipa iha eventu ne’e no rejistu laiha limitasaun, ho partisipante lokál no internasionál sira-ne’ebé sei partisipa.
Prezidente Siklizmu, Herculano dos Santos, hateten Siklizmu prepara hela atu hamoris fali Tour Timor, tuir pedidu husi Prezidente Repúblika, ne’ebé suspende durante tinan naruk.
“Prezidente Repúblika hato’o fila-fali ona katak ita-presiza prepara ba Tour Timor, tanba ita tenke deside hamutuk ho Indonézia oinsá atu la’o,” nia dehan.
Tour Timor ne’ebé atu realiza, tuir planu sei hahú husi Kupang Nusa Tengara Timur (NTT) mai Timor-Leste maibé komisaun sei servisu maka’as hodi koordena ho Indonézia atu hetan autorizasaun.
Notísia Relevante: Tinan Ne’e, Governu La Tau Orsamentu Realiza Tour de Timor
Jornalista : Hortencio Sanchez
Editór : Cancio Ximenes
