DILI, 26 Novembru 2025 (TATOLI)-Prezidente Komisaun B iha Parlamentu Nasionál ne’ebé trata Asuntu Negósiu Estranjeiru, Defeza no Seguransa, Augusto Domingos ‘Deker’, solisita ba Komandu Polísia Nasionál Timor-Leste (PNTL) atu reativa patrullamentu iha tempu kalan, liuliu iha Dili.
Nia lamenta ho kestaun seguransa iha fatin balun tanba joven no grupu balun, iha kalan, hemu tua, kanta, hakilar, liuliu iha área kruzamentu Delta 2 hodi perturba ema seluk nia deskansa.
“Ho ida-ne’e, rekomenda ba komandu PNTL, reativa patrullamentu iha tempu kalan”, nia hato’o.
Tuir deputadu, nesesita duni halo patrullamentu tanba atu komemora Loron Proklamasun Indepedénsia Unilaterál no selebrasaun natál no tinan foun. “Presiza situasaun ne’ebé hakmatek no sidadaun hotu iha liberdade atu goza ho sira-nia família iha uma”, dehan.
Deputadu Deker apela ba sidadaun hotu atu kontinua kontribui ba pás no estabilidade iha rai-laran hodi aselera dezenvolvimentu país.
Jornalista: Nelson de Sousa
Editora: Maria Auxiliadora
