DILI, 01 Dezembru 2025 (TATOLI)—Diretór Ezekutivu Arkivu Muzeu Rezisténsia Timorense (AMRT), Jorge Alves “We Moris”, hateten dokumentu istóriku balun ne’ebé daudaun ne’e iha Arkivu Rezisténsia ne’e sei muda ba Jardín Chama Eterna bainhira finaliza ona.
“Tanba ita-nia alvu ne’e sei finaliza projetu Jardín Chama Eterna iha Fevereiru ka Marsu 2026 tanba projetu referidu agora atinje ona 75%. Entaun, dokumentu balun sei tau ne’ebá nune’e vizitante sira bele mai asesu,” nia dehan ba jornalista sira iha nia kna’ar fatin, Kolmera, Dili, Segunda ne’e.
We Moris esplika prosesu konstrusaun ne’e tinan rua ona maibé foin mak atinje 75% tanba kestaun udan no iha tempu ne’ebá entaun halo kanselamentu, no kestaun seluk vizitante internasionál barak entaun dalaruma haruka sira para no ida-ne’e mós kontribui.
Nian dehan, hosi pursentu ne’e hein kompleta parte hosi laran de’it, espera iha fulan tolu haat mai finaliza ona.
Konstrusaun ne’e hala’o durante fulan 30 hahú hosi fulan-Fevereiru 2023 to’o Setembru 2025 no responsabiliza hosi empreza Starking no MDF Acesso iha Venture no supervizaun mak responsabiliza husi Consorcio Soares no Guterres.
Medida rai ba konstrusaun ne’e purvolta rihun 2-resin kuadradu ho kustu konstrusaun fízika $4.000.000-resin, inklui kustu ba unidade projetu jestaun no kustu ba supervizaun $5.000.000-resin.
Jornalista: Osória Marques
Editór: Xisto Freitas da Piedade
