DILI, 01 Dezembru 2025 (TATOLI)—Sentru Saúde sira iha Dili halo destroisaun ba lixu médiku iha fatin ne’ebe identifikadu ona tanba tauk soe arbiru hodi hada’et fali moras ba ema seluk hanesan moras HIV/SIDA, Tuberkuloze, Hepatitis no seluk tan.
Xefe Sentru Saúde Formosa, Teresa Pinto, hateten durante ne’e sira halo destroisaun ba lixu médiku iha Postu Administrativu Metinaru nune’e labele afeta ba komunidade sira-nia saúde.
“Ha’u atu hateten de’it kona ba lixu médiku nian ne’ebé durante Sentru Saúde Formosa iha katak ami prepara fatin safety box tau iha sala emerjénsia, maternidade no mós Laboratóriu, nune’e profisionál sira utiliza hotu ekipamentu médiku bele tau iha fatin ne’ebé mak prepara ba,” Teresa Pinto hateten ba jornalista sira iha nia kna’ar fatin, ohin.
Nia esplika, ekipamentu médiku ne’e banhira utiliza hotu tau iha fatin refere, ekipa husi servisu saúde Ambientál iha Fomosa ba foti hodi ba halo destruisaun iha Metinaru.
“Banhira sira ekipa Ambientál mai foti ona tau hamutuk ho sentru saúde sira Dili laran nian, ami mós hahú halo ona pedidu ba Autoridade Munisípiu Dili atu halo koordenasaun ho ekipa Ambientál ne’ebé mai husi Organizasaun Mundiál Saúde atu ba halo destruisaun iha Metinaru.
Nia haktuir, lixu médiku ne’e iha hanesan daun, botil ai-moruk nia fatin no lixu laboratóriu nian hanesan fatin ne’ebé mak tau raan ba, tenke tau fatin ida no labele soe arbiru.
“Ita tauk tanba labarik sira balun halimar fali, entaun bele hada’et moras seluk ba ema sira seluk, tanba ida-ne’e mak ami tenke tau fatin propriu ida,” nia dehan.
Atu destrui ne’e depende ba fatin box bainhira nakonu mak ba sunu, tanba fatin Metinaru ne’ebé mak atu ba sunu ne’e dook husi komunidade nia hela fatin, entaun laiha impkatu ba sira-nia saúde.
Iha sorin seluk, Diretór Servisu Saúde Munispiu Ermera, António de Jesus, hateten Munispiu Ermera iha ona mákina jeneratór, nune’e bele sunu lixu médiku atu labele afeta ba komunidade nia saúde.
“Mákina jenerator ne’e apoiu husi ita-nia parseiru UNICEF, nune’e hodi utiliza ba sunu lixu médiku, tanba antes ne’e ami seidauk iha mákina jeneratór ami ba destrui de’it lixu médiku ne’ebé mak dook husi komunidade,” nia dehan.
Jornalista : Felicidade Ximenes
Editór : Cancio Ximenes
