DILI, 03 Dezembru 2025 (TATOLI) — Ministru Administrasaun Estatál, Tomas do Rosário Cabral, entrega ofisialmente kareta Estadu ualu ba Autoridade Munisípiu Baukau.
“Viatura Estadu nu’udar meiu esensiál ida ne’ebé fasilita mobilidade no asesu ba área remota hodi halo supervizaun ba projetu sira no fó resposta ba emerjénsia iha nível postu administrativu no munisipál,” governante dehan liuhusi nota komunikadu, ne’ebé TATOLI asesu, Kuarta ne’e.
Ministru konsidera distribuisaun kareta Estadu ho formalizasaun termu entrega ofisíal ida-ne’e nu’udar pasu importante ida hodi reforsa kapasidade Estadu nian, atu responde ba nesesidade publiku ho efikás no efisiente iha nivel munisipál.
Tomás Cabral solisita ba autoridade lokál utiliza ho responsabilidade hodi halo atendimentu ba publiku, ida-ne’e pasu ida oinsá atu prenxe kondisaun mínimu hodi hakat ba desentralizasaun poder lokál.
“Husu ba estrutura servisu munisipál hotu atu tau atensaun másimu hodi hametin liña koordensaun di’ak no iha responsabilidade asume kna’ar ne’ebé iha, hodi bele prenxe kondisaun mínimu atu hakat ba desentralizasaun administrativa no poder lokál nune’e ba futuru bele lori dezenvolvimentu ba povu iha munisípiu Baukau,” nia akresenta.
Tuir nia, Ministériu Administrasaun Estatál iha kompromisu atu reforsa kapasidade operasionál administrasaun lokál no servisu munisipál sira hodi garante prestasaun servisu publiku ne’ebé efikás no efisiénte ba sidadaun hotu-hotu.
Iha fatin hanesan, Prezidente Autoridade Munisípiu Baukau, Veneranda Lemos Martins, agradese ba Governu ne’ebé entrega ona viatura munisípiu referidu.
“Desizaun ida-ne’e nu’udar pasu importante ida hodi reforsa kapasidade estrutura servisu munisipál atubele mellora prestasaun servisu publiku ba komunidade sira iha Baukau”, nia haktuir.
Husi Veikulu ualu ne’e, tolu entrega ba sekretariadu munisipiu sira, ida ba gabinete apoiu tékniku Prezidente Autoridade Munisípiu Baukau, ida ba Autoridade Postu Administrativu (APA) Baguia, ida ba APA Quelicai Antigu, ida 1 ba APA Matebian nian no ida ba Servisu Munisipál Patrimóniu no Lojístika nian.
Jornalista : Osória Marques
Editór : Cancio Ximenes
