KOVALIMA,03 Dezembru 2025 (TATOLI) – Reprezentante Ministériu Solidariedade Sosiál no Inkluzaun (MSSI) hamutuk ho Autoridade Munisípiu Kovalima komemora loron mundiál Ema ho Defisiénsia (EhD),tanba partisipasaun EhD importante iha prosesu dezenvolvimentu.
Selebrasaun loron mundiál EhD ne’ebé ONU deside nia tema “ Haburas Sosiedade ne’ebé inkluzivu ba defisiénsia hodi avansa ba progresu Nasionál. Tema Nasionál implementasaun planu Asaun nasionál ba EhD periódu 2021-2030 ho konvensaun direitu EhD iha nivel hotu sai xave ba TL hodi avansa ba progresu sosiál no haburas inkluzaun sosiál.
“Ita selebra loron importante ida-ne’e hodi rekoñese katak Ema Ho Defisiensia (EhD) iha Timor-Leste, iha direitu ne’ebé hanesan ho sidadaun seluk no parte importante husi prosesu dezenvolvimentu iha Timor-Leste”, Reprezentante MSSI, Manuela Oliveira Martins, hato’o liuhusi nia diskursu iha edifísiu Sentru Solidariedade Kovalima.
Serimónia komemorasaun loron mundial EhD ne’e, atu hasa’e públiku nia konsénsia kona-ba direitu ba EhD, asesu ba prestasaun servisu hotu hanesan ho sidadaun seluk, halo advokasia kona-bá bareira ne’ebé diskrimina no limita partisipasaun EhD, rekomenda estratéjia save no hadi’a promove partisipasaun EhD iha moris família komunidade no iha sosiedade.
Alende ne’e atu promove talentu no abilidade EhD hanesan dalan hamenus ho halakon diskriminasaun, kontinua halo advokasia kona-bá aprosimasaun inkluzivu sira servisu hamutuk ho parseria hodi avansa inkluzasaun sosial bazeia ba direitu fundamental ema umana no kontinua hadi’a bemstar EhD ne’ebé marjinalizada moris defisiensia ho komplesu.
MSSI mós hato’o parabens ba esforsu no kolaborasaun entre Governu, Estadu sosiedade sivil liuliu organizasaun EhD hodi implementa planu asaun nasionál periódu 2021-2030 ne’ebé maka Governu relata rezultadu ba ONU hanesan evidénsia konkrreta husi implementasaun konvensaun ONU direitu ba EhD.
Reprezentante Prezidente Autoridade Munisípiu Kovalima, Filomeno Cardoso, mós enkoraja Ema ho hodefisiénsia (EhD) no kontinua fó importánsia, nune’e servisu hamutuk ho instituisaun relevante kona-ba dever ho direitu ba EhD.
“Ha’u enkoraja no fó importánsia ba EhD servisu hamutuk ho parte hotu liuhusi MSSI luta ba ita-boot sira-nia direitu no dever iha ita-boot sira nia vida tomak no ami sei la husik ita-boot iha kotuk, ita hamutuk luta ba dezenvolvimentu iha ita-nia Nasaun TL,” nia esplika.
Jornalista:Celestina Teles
Editór: Florencio Miranda Ximenes
