PR Prabowo iha vontade solusiona fronteira terrestre no marítima
DILI, 01 Dezembru 2025 (TATOLI)–Embaixadór Timor-Leste ba Indonézia, Roberto Soares, hateten Prezidente Indonézia Prabowo Subianto iha vontade hakarak solusiona fronteira terrestre no marítima ho Timor-Leste durante ninia mandatu ne’e.
“Bainhira ha’u simu kna’ar hanesan Embaixadór Timor-Leste nian ba Indonézia, to’o iha ne’ebá ha’u hatama kedan ha’u-nia karta kredensiál ba Prezidente Prabowo Subianto. Iha ne’ebá, reuniaun kortejia ida ho nia, iha pontu ida mak ineteresante tebes mak Prezidente ne’e rasik manifesta nia vontade oinsá atu solusiona situasaun hotu ne’ebé iha relasaun ba Timor-Leste ho Indonézia. Ida importante liu mak nia mensiona kona-ba fronteira terrestre ho marítima tenke solusiona,” Roberto Soares hateten liuhusi programa entrevista eskluziva ne’ebé hala’o iha estúdiu TATOLI, Faról, segunda ne’e.
Ho vontade Prezidente Indonézia nian, nai dehan, fó oportunidade ba nia atu komunika kedan ho Governu Timor-Leste liuliu Ministériu Negósiu Estranjeiru no Kooperasaun (MNEK) prepara ekipa ida hodi hasoru malu ho Indonézia, atu ko’alia kona-ba fronteira terrestre no marítima entre Timor-Leste ho Indonézia.
“Ho nune’e mak ha’u halo kedan konsultasaun ho instituisaun relevante liuliu MNEK Indonézia no Timor-Leste nian, atu buka dalan oinsá mak bele to’o iha momentu oportunu ida, nune’e ekipa rua ida husi Timor-Leste, ida husi Indonézia bele hasoru malu hodi ko’alia kona-ba kestaun ne’ebé importante tebes ba nasaun rua ne’e mak soberania,” nia dehan.
Maibé papél esensiál ne’ebé hanesan reprezentante Timor-Leste iha Indonézia halo mak hakle’an nasaun rua (2) nia parseria no relasaun ne’ebé metin, hodi buka meiu hotu rezolve fronteira terrestre no marítima atu nune’e ba futuru laiha tan disputa.
“Ita bele dehan katak Timor-Leste ho Indonézia nia relasaun agora ne’e sa’e liutan. Iha momentu ida ne’ebé mak ita akompamarítima konjuntura polítika iha mundu iha dezentendimentu barak, maibé ita ho Indonézia iha pasadu ho relasaun ne’ebé moruk maibé laiha problema no haree malu di’ak nafatin. Ida-ne’e mak ita-nia luta atu bele konklui saida mak ita hakarak,” nia dehan.
Ho prosesu ne’ebé dadaun ne’e la’o hela, diplomata timoroan ne’e fiar katak iha tempu sira tuir mai bele rezolve fronteira terrestre no marítima entre Timor-Leste no Indonézia.
Jornalista : Hortencio Sanchez
Editór : Cancio Ximenes
