DILI, 17 Dezembru 2025 (TATOLI)–Vise-Primeiru-Ministru no Ministru Koordenadór Asuntu Sosiál, Mariano Assanami Sabino prefere Parlamentu Nasionál (PN) halo lei ba rekoñesimentu juventude rezisténsia sira.
“Rekomenda ba Parlamentu Nasionál atu halo revizaun ba Lei Kombatente Libertasaun Nasionál hodi rekoñese mós juventude rezisténsia ne’ebé la rejistadu,” Vise Assanami dehan ba jornalista sira iha Salaun Três de Março Maubai, Komoro, Kuarta ne’e.
Nia haktuir daudaun ne’e kombatente sira hahú simu direitu pensaun maibé parte relevante mós tenke kria lei ida para bele fó rekoñesimentu ba juventude rezisténsia.
Ministru Dezenvolvimentu Rurál no Abitasaun Komunitária ne’e tenik iha veteranu no iha ema lubuk ida-ne’ebé mate sein naran no la koñesidu ne’ebé hakoi iha Likisá no hakoi iha fatin lubuk ida, sira mate ba rai ida-ne’e.
“Joven sira lakohi tau naran más kuandu mate tenke respeitu no fó omenajen banhira hakoi, tanba nia eroi ida,” nia subliña.
Enkuantu, Prezidente Konsellu Kombatente Libertasaun Nasionál (CCLN-sigla portugeza), Vidal de Jesus “Riak Leman”, dehan kongresu daruak CCLN la’o tuir regra ne’ebé iha ona.
“Buat hotu-hotu lei mak regula. Ami ne’e la’o tuir lei ne’ebé iha,” nia informa.
Jornalista: Osória Marques
Editór: Xisto Freitas da Piedade
