DILI, 04 Dezembru 2025 (TATOLI)-Governu Timor-Leste no Angola asina ona Akordu izensaun vistu pasaporte diplomátiku no serbisu hodi tulun mobilidade entre Estadu rua, ne’ebé sei hetan ratifikasaun husi Parlamentu Nasionál.
Nune’e, Komisaun B ne’ebé trata Asuntu Negósiu Estranjeiru, Defeza no Seguransa, hala’o audiénsia ho Ministru Negósiu Estranjeiru no Kooperasaun, Bendito Freitas, kona-ba akordu referidu.
Ministru lembra katak Governu husi nasaun rua ne’e asina akordu iha 08 Jullu 2024 iha Angola, durante vizita Estadu Prezidente Repúblika, José Ramos-Horta.
“Tanba parte Governu Angola aprova, kumpre ona rekezitu legál, nune’e mai hato’o ba Komisaun, atu hato’o ba plenária hodi hetan aprovasaun hodi hetan validade”, nia hateten hafoin ramata sorumutu iha Parlamentu, ohin.
Durante audiénsia, diskute mós rezolusaun ne’ebé Parlamentu presiza ratifika kona-ba Estatutu Komunidade País Ko’alia Lian Portugés (CPLP, sigla portugés) ho nia dokumentu ne’ebé asina iha 27 Marsu 2023, iha Luanda.
Ho aprovasaun husi Parlamentu mak ofisializa estatutu ne’ebé Timor-Leste hola parte hanesan membru.
Prezidente Komisaun B, Domingos Augusto ‘Deker’, dehan proposta rezolusaun ne’e feitu ona husi Governu no Komisaun hato’o de’it relatóriu no paresér hafoin submete ba meza Parlamentu hodi ajenda ba plenária, iha semana oin.
Jornalista: Nelson de Sousa
Editora: Maria Auxiliadora
