KOVALIMA, 17 Dezembru 2025 (TATOLI)- Sekretáriu Estadu Formasaun Profisionál no Empregu (SEFOPE), servisu hamutuk ho Komponente Navál no Unidade Polísia Marítima (UPM), atu fasilita formasaun luku-tasi ba kandidatu traballadór sira ne’ebé hakarak ba iha korea,nune’e traballadór bele salva nia vida.
Polítika formasaun ne’e ho razaun atu fasilita formasaun ba kandidatu traballadór bá Korea Súl. Tanba daudaun ne’e traballadór balun konsege lakon vida tanba laiha abilidade iha luku-tasi.
Notisia relevante: Traballadór iha Koreia: Serbisu iha área peska todan, SEFOPE tenke fó formasaun molok haruka timoroan
“Ita sei muda sistema hodi servisu hamutuk Komponente Navál no UPM atu fasilita formasaun durante fulan-tolu, atubele iha abilidade ba luku-tasi, nune’e bainhira traballadór monu ba tasi, sira hatene luku hodi bele salva sira nia vida”, Diretór Jerál SEFOPE Carlito Rosário Cabral, hato’o iha salaun Eskola Sekundáriu Jerál Públiku, Postu Suai, ohin.
Polítika SEFOPE haruka traballadór ba servisu iha rai li’ur liuhusi programa mobilidade laborál ho objetivu traballadór sira iha esperénsia foun no manán osan bainhira kontratu ramata traballadór fila mai kria kampu traballu iha Timor-Leste.
“Traballadór servisu iha rai liur atu hadi’a ekonómia iha uma-laran la’ós hamosu problema iha nia família, tanba realidade hatudu katak, traballadór balun ba servisu iha rai-li’ur ne’e, tanba balun halai husi problema, balun kria problema iha nia família rasik, nune’e ami tenke rezolve problema família traballadór sira,” nia alerta.
Jornalista:Celestina Teles
Editór :Florencio Miranda Ximenes
