Atleta Taekwondo Messias Mota gaña medalla osan-metan iha SEA Games
DILI, 12 Dezembru 2025 (TATOLI)–Atleta Timor-Leste modalidade Taekwondo, Messias Dates Mota gaña medalla osan-metan ba Timor-Leste iha kompetisaun desportu SEA Games 2025 iha Tailándia, Kinta (11/12/2025).
Messias Mota ne’ebé iha faze quarterfinals kompete iha klase mane kategoria kilógrama 87 manán atleta husi Kambodia, Soklong Chhun no kontinua hakat bá meiu finál derrota ho atleta husi Malázia, Syafiq Zubber Muhammad ho skor 0-2.
Notísia relevante: Ekipa Feto Taekwondo gaña medalla dahuluk ba Timor-Leste iha SEA Games
Ho rezultadu ne’ebé Messias Mota iha, modalidade Taekwondo konsege aumenta medalla osan-metan ba Timor-Leste hamutuk rua iha-ne’ebé antes ne’e rekolla husi ekipa feto iha klase Poomsae.
Modalide Taekwondo husi Timor-Leste ne’ebé partisipa iha SEA Games hamutuk na’in-sia hanesan Devino da Costa, Ana Pinto, Mesias Costa, Cerílio Lein, Domingos Lein, Tey Xena Dias, Dircia Punef, Teresa Lein no Merinda da Costa Soares.
Entretantu, kontijente Timor-Leste rasik iha kompetisaun desportu SEA Games hamutuk modalidade lima kompostu husi Atletizmu, Taekwondo, Karate-Do, Boxe no Futeból ho totál atleta hamutuk 53.
Jornalista: Natalino Belo
Editór: Xisto Freitas da Piedade
