DILI, 31 Dezembru 2025 (TATOLI)—Vise Primeiru-Ministru (PM), Ministru Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino husu ba ministériu idaidak atu kontinua rezolve funsionáriu sira-nia pagamentu estraordináriu (saláriu 13).
“Lae hothotu iha direitu, hothotu sei garante. Problema jestaun de’it ne’ebé ita sei haree,” Vise PM Assanami hateten ba Jornalista sira hafoin partisipa serimónia komemorasaun loron eroi nasionál ne’ebé hala’o iha rotunda estátua Nicolau Lobato, Komoro, Kuarta ne’e.
Notísia relevante : Governu aprova pagamentu estraordináriu ba Administrasaun Públika
Nia esplika, baibain Ministériu Finansa (MF) mak responsabiliza saláriu 13 maibé hahú tinan ne’e iha mudansa.
“Maibé polítika ikus ne’e lei muda para depois idaidak iha ministériu mak haree, entaun presiza reajusta de’it ne’ebé laiha problema ida,” governante ne’e akresenta.
Nia konsidera, ba kestaun ne’e problema tempu no presiza jestaun di’ak.
“Durante ne’e laiha problema tanba ita prevee iha finansa, uluk-uluk ita prevee iha ne’ebá. Dadaun iha ministériu idaidak, entaun ministériu idaidak tenke jere, laiha tanba kazuais ka tanba saida ne’e isu-isu de’it,” nia rejeita informasaun ne’ebé espalla
Tanba ne’e, Vise PM husu ba públiku atu labele fiar informasaun sira ne’ebé lansa husi ema irresponsável.
“Ema kuandu kazuais ne’e laiha impaktu, ita prevee osan 13 ne’e to’o fim do ano. Ba ohin ha’u hanoin ne’e laiha ona problema,” nia katak.
Jornalista : Natalino Costa
Editora : Julia Chatarina
