DILI, 06 Janeiru 2026 (TATOLI)-Deputadu husi Partidu Frente Revolusionária Timor-Leste Independente (FRETILIN), David Dias Ximenes, husu ba entidade relevante atu halo investigasaun kle’an ba sidadaun feto husi Indonézia, ne’ebé deskonfia falsifika dokumentu hodi simu pensaun veteranu nian.
Nia dehan, tuir loloos, ekipa husi Ministériu Asuntu Kombatente Libertasaun Nasionál (MAKLN) no Konsellu Kombatente Libertasaun Nasionál (KKLN) tenke halo verifikasaun ida di’ak ba dadus kombatente hodi labele mosu falsifikasaun ba dokumentu.
Tanba ne’e, presiza investigasaun kle’an hodi hatene sé mak fasilita prosesu no dokumentu sira seluk hanesan sidadaun estranjeira ne’e bele asesu kartaun eleitorál no billete identidade. “Investigasaun ne’ebé la’o hela, hodi apuramentu verasidade husi ne’ebá mak ita bele hetan”, nia dehan.
Deputadu husi Partidu Kongresu Nasionál Nasionál Rekonstrusaun Timorense (CNRT), Natalino dos Santos, mós preokupa no husu atu halo investigasaun profunda no bainhira identifika mosu aktu krime ruma tenke prosesa hodi hatán ba justisa.
“Entidade kompetente tenke tau atensaun séria ba kestaun referida, tanba falsifikasaun dokumentu antes ne’e mosu kazu barak ne’ebé rejista iha autoridade judisiál no balun hetan ona desizaun. Nu’udar veteranu ida mós preokupa, husu atu tau atensaun sária”, nia afirma.
Deputada husi Partidu Demokrátiku (PD), Maria Teresa Gusmão, la aseita aktu falsifikasaun dadus hodi asesu pensaun kombatente husi Estadu. “Veteranu ne’e naran ida segredu no lulik, Timór rona naran hanesan ne’e sira ta’uk, tanba luta ba ida-ne’e”, nia subliña.
Iha sorin seluk, Ministru Asuntu Kombatente Libertasaun Nasionál, Gil da Costa “Oan Soru”, hateten sidadaun Indonézia ne’ebé deskonfia falsifika falsifika dokumentu hodi simu pensaun veteranu ne’e iha ona Diresaun Servisu Investigasaun Kriminál (DSIK) nia liman.
Notísia relevante: https://tatoli.tl/2026/01/05/sidadaun-indonezia-neebe-falsifika-dokumentu-hodi-simu-pensaun-veteranu-asegurada-iha-pcic/
Jornalista: Nelson de Sousa
Editora: Maria Auxiliadora
