DILI, 05 Janeiru 2026 (TATOLI)—Ministru Asuntu Kombatente Libertasaun Nasionál (MAKLN), Gil da Costa Monteiro “Oan-Soru”, hateten sidadaun feto Indonézia ne’ebé falsifika dokumentu hodi simu pensaun veteranu ne’e iha ona Diresaun Servisu Investigasaun Kriminál (DSIK) nia liman.
“Kona-ba ema falsifika ka lae ne’e, ita hein prosesu tanba kazu ne’e iha hela DSIK nia liman. Nune’e, hakarak apela katak labale falsifika dokumentu hosi sofrimentu raan fakar, ruin naklekar, faluk no oan ki’ak. Tanba ne’e, labele inventa tanba rai ne’e lulik sosa ho raan no ruin,” Oan-Soru dehan ba jornalista sira iha Gabinete MAKLN, Komoro, Dili, Segunda ne’e, relasiona sidadaun feto Indonézia ne’ebé falsifika dokumentu hodi hetan pensaun veteranu ne’ebé konsege kaptura ona husi autoridade seguransa iha foin lalais ne’e.
Oan-Soru esplika pensaun sobrevivénsia iha artigu 27 númeru 10, hateten ema ka família ne’ebé hetan benefísiu hosi mártir ida nian, maibé nia labele kolabora ho inimigu kontra interese ukun rasik an nian. Se nia kontra mak nia atu oan ka maun-alin sei la simu pensaun. Maibé se sidadaun ruma mak simu mak ne’e krime.
“Problema ema ruma la halo keixa dezde inísiu. Ha’u rasik haree iha mídia sosiál sidadaun Indonézia ne’e bele hetan dokumentu hanesan RDTL, kartaun eleitorál no billete identidade ne’e grave liu. Entaun, oinsá mak ema hetan dokumentu hanesan ne’e. Ida-ne’e hatudu ita-nia nasaun sei iha ema importante ida-ne’ebé servisu iha instituisaun Estadu ne’ebe koopera ho ema seluk hodi fó dokumentu legál ba ema seluk, ne’e krime,” nia akresenta.
Governante ne’e subliña dalaruma istória nakfilak ba osan mak mosu favoritizmu. Tanba Timor ne’e opta dupla sidadania mak sai tiha hanesan ne’e.
Sidadaun estranjeiru oras ne’e daudaun autoridade seguransa asegura ona iha Dili no hein submete ba prosesu investigasaun.
Jornalista: Osória Marques
Editór: Xisto Freitas da Piedade
