DILI, 02 Janeiru 2026 (TATOLI)—Polísia Nasionál Timor-Leste (PNTL) rejista krime neen durante selebrasaun tinan foun.
“Durante iha dia 31 to’o dia 01 ita rejista kazu hamutuk iha neen. Iha kazu lima mak ho tipu agresaun fízika simples, iha suspeitu na’in-neen mós ita detein 72 oras, ita kontinua halo prosesu,” Komandante PNTL Munisípiu Dili, Superintendente Xefe Polísia Orlando Gomes, informa ba Jornalista sira iha ninia knaar fatin, Eskuadra Dom Aleixo, Sesta ne’e.
Nia haktuir, iha kazu tentativa omesídiu ida mak akontese iha aldeia 03, Suku Fatuhada.
“Iha kazu ida-ne’e suspeitu ida mak tenta tama ema-nia uma sein autorizasaun, lori tali hodi haka’as vítima nia kakorok. Maibé vítima hakilar viziñu sai hotu konsege kaer suspeitu no Polísia mós ba kaptura kedan suspeitu lori kedan mai iha sela hodi halo detensaun 72 oras,” nia akresenta.
Notísia relevante : Sidadaun estranjeiru halo agresaun fízika hasoru membru PNTL
Tanba ne’e, Autoridade Seguransa konsidera kazu ne’e hanesan tentativa omesídiu, tanba ne’e aprezenta ba Ministériu Públiku (MP).
Iha biban ne’e, Komandante Orlando relata liután katak iha ámbitu selebrasaun tinan foun, Komandu PNTL liuhusi Diresaun Nasionál Seguransa Tránzitu Rodoviária konsege halo apreensaun ba motór kanu racing hamutuk-26.
“Motór kanu racing sira ne’e ita preende no asegura iha Komandu Munisípiu Dili hodi hein na’in ba motór aprezenta dokumentu para ita hatene motór sira ne’e legál ka ilegál,” nia katak.
Nia informa mós katak PNTL mós preende motór RX-King unidade lima ne’ebé joven sira halo movimentu no barullu iha bairru sira iha kapitál Dili, daudaun asegura iha Komandu Munisípiu Dili.
PNTL Dili mós rejista asidente tráfegu haat durante loron 31 Dezembru to’o 01 Janeiru. Tolu asidente normál no ida asidente fatál ne’ebé rezultadu ema na’in-ida hakotu iis iha área Manleuana.
Situasaun seguransa la’o normál
Iha sorin seluk, Komandante PNTL Munisípiu Dili relata, Forsa Tarefa Konjunta hamutuk Forsa Defeza Timor-Leste bainhira halo patrullamentu la’o ain tama sai bairru no halo patrullamentu ho karreta inklui destaka membru sira iha área risku sira konsege halo hakalma situasaun sira tomak.
“Hahú husi lorin 31 Dezembru to’o 01 Janeiru situasaun jeralmente ne’e la’o di’ak tebes, ita-nia sidadaun sira mós goza sira-nia liberdade ne’ebé mak ho di’ak tebtebes,” nia hato’o.
Nia dehan, iha loron 31 Dezembru PNTL rejista kazu balun hanesan iha área Kaikoli ne’ebé iha joven balun tuda malu oituan nune’e Forsa Tarefa Konjunta halo intervensaun kedan.
Iha mós akontesimentu konflitu entre joven ho joven iha área Dom Aleixo tanba konsumu alkól, maibé Forsa Tarefa Konjunta normaliza situasaun kedan iha momentu ne’ebá.
“Ita detein mós ita-nia joven kuaze na’in-12 iha Eskudra Dom Aleixo, tanba ita-nia joven sira konsumu alkól barak. Ita detein sira depois iha loron seguinte mak ita husik fali sira,” nia katak.
Aleinde ne’e, Forsa Tarefa Konjunta kontinua nafatin tau seguransa iha tasi-ibun no halo patrullamentu hodi asegura movimentu sidadaun sira ne’ebé mak halo paseu ba parte leste ninian hanesan Kristu-Rei to’o Akanunu inklui halo paseu iha parte oeste ninian hahú Tasi-tolu to’o Likisá.
“Ita nafatin kontrola sidadaun sira-nia paseu no mós sira filafali mai ho diak,” nia haktuir.
Komandu Munisípiu Dili mós koloka Polísia Tránzitu sira iha parte Leste, Oeste no fatin públiku, atu nune’e bele kontrola nafatin seidaun sira bainhira fila husi paseu.
“Situasaun la’o di’ak tebtebes,” nia katak.
Superintendente Xefe Polísia Orlando Gomes, hateten durante selebrasaun tinan foun PNTL la halo apreensaun ba karreta Estadu.
“Durante ita-nia halo swiping iha Dili laran ita la deteta karreta Estadu ne’ebé mak iha,“ nia katak.
Jornalista : Natalino Costa
Editora : Julia Chatarina
