DILI, 11 Jullu 2025 (TATOLI)-Komandante Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes, hateten membru PNTL ida husi sesaun Tránzitu Seguransa Rodoviáriu hetan agresaun fízika husi estranjeiru ida iha área Ponte Komoro.
Kazu ne’e akontese loron sesta (11/07) dadeer maizumenus tuku 09:00 bainhira membru PNTL halo kontrola ba movimentu transporte iha área referida, membru ne’e haree sidadaun estranjeiru mane na’in-rua ho karreta marka sedan liu iha nia oin no sidadaun ne’e ko’alia hela telefone no liman kondús hela karreta.
Nune’e membru ne’e para hodi fó hanoin katak labele lori karreta akompaña ko’alia telefone ne’e fó perigu hanesan motorist, tantu ema ne’ebé la’o ain ne’e bele rezulta asidente. Maibé sidadaun ne’e la simu no para loos karreta, nune’e tuku kedan isin ba membru tránzitu ne’e.
“Foin daudaun ita-nia memnbru husi tránzitu hala’o sira-nia servisu iha ponte Komoro, depois sidadaun estranjeiru balun ne’ebé liubá ho karreta ba, tanba telefone, entaun membru tránzitu ne’e hapara fó avizu para kondús hela transporte labele uza telefone. Maibé estranjeiru ida la simu no lakon kontrolu, ho emosaun hodi tún husi karreta tebe ita-nia membru PNTL”, Orlando Gomes hateten ba jornalista sira iha nia kna’ar fatin eskudra Don Aleixo Aimutin, sesta ne’e.
Nia informa, hafoin sidadaun estranjeiru ne’e tebe membru PNTL ne’e, sidadaun estranjeiru halo tán asaun kontinuasaun hodi rasta tán membru tránzitu ne’e hodi rezulta liman hetan kanek no ran sulin.
“Tanba ne’e, ita membru PNTL ne’e keixa ba komandu eskuadra Don Aleixo hodi halo prosesu tuir dalan legál ba Ministériu Públiku, tanba sidadaun na’in-rua ne’e komete krime obstrusaun ba autoridade, ohin ita bolu kedan sidadaun estranjeiru nain rua ne’e mai iha ne’e, hodi halo identifikasaun hodi haree kazu ne’e no halo detensaun ba sidadaun na’in-rua ne’e”, nia relata.
Orlando informa, Komandu Eskudra Don Aleixo simu ona keixa ba kazu ne’e, no sei konklui aktu hodi haruka ba Ministeriu Públiku, depende ba orientasaun MP kuandu autoriza polísia detein, mak polísia halo detensaun ba sidadaun estranjeiru na’in-rua ne’e tanba sira nia aktu ne’e krime ona krime ne’ebé hanaran obstrusaun ba autoridade.
Jornalista : Natalino Costa
Editora : Rita Almeida
