DILI, 07 Janeiru 2026 (TATOLI)–Ministru Interiór, Francisco da Costa Guterres, hateten, Governu tinan ne’e planeia halo reforma ba membru Polísia Nasionál Timmor-Leste (PNTL) ne’ebé sofre moras prolongada.
“Ida-ne’e ein ternus saúde halo sira labele halo serbisu ona, balun toba de’it iha uma, balun tanba uluk halo serbisu hodi rezulta kanek ne’ebé que labele halo serbisu, hetan tratamentu hela de’it. Entaun, prontu ita dehan lae, tempu ona para imi tenke fila bá deskansa. Sira ne’e sei reforma iha tinan 2026,” Ministru Francisco hato’o ba Jornalista sira hafoin partisipa iha reuniaun Konsellu Ministru ordinária iha Palásiu Governu, Kuarta ne’e.
Membru PNTL sira ne’ebé sei reforma iha tinan ne’e sei simu nafatin sira-nia direitu reforma.
“Sira nafatin hetan asesu ba reforma, se lae kuitadu sira la mai serbisu sira halo saida. Kuandu sira la mai serbisu ne’e ko’a sira-nia osan, maibé kuandu sira ba reforma para ita fó sira bá reforma,” nia akresenta.
Notísia relevante : KFP semana oin despede funsionáriu públiku reformadu 1.985
Komandu PNTL antes ne’e relata dadus ba Ministru Interiór katak iha membru balun mak nia saúde ladún di’ak.
“Balun moras ne’ebé labele la’o, balun moras ne’ebé ita-nia ain sira ne’e tuur de’it iha kadeira roda, balun toba de’it, entaun ita tenke halo buat sira ne’e hotu,” nia tenik.
Ministru informa, iha membru PNTL 100-resin ne’ebé mak daudaun sofre moras prolongada.
“PNTL haruka ona ba ha’u, ne’ebé ha’u simu ona. Ami hein de’it despaisu legál kuandu sai ita públika iha Jornál Repúblika para depois ami hahú prosesu hodi halo reforma ba sira,” nia katak.
Ministériu Interiór (MI) rasik haree no halo ona prosesu, katak reforma ba membru PNTL ho moras prolongada ne’e la inklui ho membru na’in 158 ne’ebé molok ne’e Governu anteriór haruka reforma no ikus mai IX Governu haruka sira tama fali.
“Sira ida na’in-158 pesoál ne’ebé antes ne’e reforma fali mak Governu haruka taka fali hodi halo funsaun ne’e Governu sei halo reforma iha tinan 2027 sira ne’e reforma normál,” nia katak.
Jornalista : Natalino Costa
Editora : Julia Chatarina
