DILI, 07 Janeiru 2026 (TATOLI)-Governu liuhusi desizaun koletiva iha Konsellu Ministru aprova dekretu-lei rua kona-ba dekretu lei nú. 73/2023 kona-ba ajustamentu alterasaun dahuluk funsionamentu institusionál Ministériu Interiór.
Proposta ne’e ho objetivu atu hasa’e efikásia no inefisiénsia bainhira hala’o servisu sira Ministériu nian, no halo reorganizasaun funsionál foka ba redistribuisaun responsabilidade entre diresaun nasionál sira, halakon redundánsia no promove sinerjia operasionál sira liuhosi reestruturasaun ba estrutura sira-ne’ebé iha ona.
Ministru Interiór, Francisco da Costa Guterres, hateten Dekretu-lei rua ne’e hafoin MI halo analiza ba implementasaun husi dekretu-lei rua ne’e hetan lakuna balun kona-ba pozisaun hodi hamosu deskoordenasaun servisu.
“Nune’e, ohin, MI mai para hadi’a tiha dekretu-lei rua ne’e hodi bele hamosu servisu operasionál ne’ebé di’ak liután,” Ministru ne’e informa ba jornalista sira iha Palásiu Governu, ohin.
Nia hatutan, iha Diresaun ida-ne’ebé sira muda de’it naran tanba mosu deskoordenasaun servisu ho pozisaun ne’ebé iha.
Medida prinsipál sira inklui transformasaun Diresaun Nasionál Administrasaun no Planeamentu iha Diresaun Nasionál Administrasaun, Arkivu no Formasaun, reorganizasaun Diresaun Nasionál Lojístika, Jestaun Patrimóniu no Arkivu ba Diresaun Nasionál Lojístika no Jestaun Patrimóniu, nune’e mós halo ajustamentu ba responsabilidades Diresaun Nasionál Rekursu Umanu nian no esklaresimentu ba papél Gabinete Apoiu Jurídiku no Asesoria no mós Gabinete Seguransa.
Alterasaun ida-ne’e nu’udar optimizasaun organizasionál ida ho impaktu orsamentál mínimu, hodi kontribui ba klareza funsionál ne’ebé boot-liu, hametin koordenasaun entre servisu no bele hamenus kustu operasionál sira.
Medida ne’e tuir duni Programa Governu Konstitusionál da-sia (IX) nian, hodi reafirma kompromisu atu hadi’a nafatin funsionamentu hosi instituisaun seguransa Estadu nian.
Jornalista : Alexandra da Costa
Editór : Cancio Ximenes
