DILI, 11 Dezembru 2025 (TATOLI)—Komisaun Funsaun Públika (KFP) tuir planu iha Fulan-Dezembru nia laran sei halo despedida ho funsionáriu públiku na’in-1.985 ne’ebé tama ona iha lista reforma iha tinan 2026.
“Komisaun Funsaun Públika sei halo serimónia ida hodi despede funsionáriu públiku ne’ebé sei tama reforma obrigatóriu hamutuk na’in-1.985. Serimónia ida-ne’e Komisáriu Protofoliu asuntu Pensaun Reforma, Jorge Paiva Araújo mak sei organiza hodi despede funsionáriu publiku ne’ebé sei tama reforma obrigatóriu. Tanba ne’e, ha’u husu ita-boot sira-nia akompañamentu tanba serimónia ne’e ita sei realiza iha munisípiu Aileu, iha loron 18 Dezembru ne’e,” Prezidente KFP, Agostinho Letêncio de Deus hato’o ba Jornalista sira iha Sentru Retiru Dare, Kinta ne’e.
Númeru ne’e inklui ona ho funsionáriu públiku husi Ministériu Edukasaun (ME) hamutuk na’in-1.320.
“Reforma obrigatóriu ne’ebé Komisaun Funsaun Públika halo daudaun ne’e ba funsionáriu públiku sira ne’ebé atinje ona idade 65 ba leten,” nia katak.
Notísia relevante : Profesór na’in-116 iha Kovalima tama lista reforma obrigatóriu
Prezidente KFP subliña, reforma seluk mak daudaun ne’e KFP hahú halo formasaun karatér ba funsionáriu sira.
“Tanba ne’e, situasaun ne’ebé ita sei halo tuir mai mak re-ajustamentu ba forsa traballu, husi ne’e ita foin define katak kada tinan ita rekruta funsionáriu na’in hira,” nia tenik.
Iha biban ne’e, Agustinho Letêncio mós informa katak KFP sei buka atu rezolve funsionáriu sira ne’ebé ho tipu kontratadu, ne’ebé dedika-an iha administrasaun públika durante tinan barak ona.
“Rezolve la signifika katak automátikamente ita fó sira liu, maibé sei liuhusi selesaun ida. Ita atu dehan liu husi selesaun pur-méritu atubele garante nia transparánsia ba ema hotu ne’ebé iha esperiénsia di’ak no tinan barak ona serbisu iha administrasaun publika atubele asesu,” nia katak.
Jornalista : Natalino Costa
Editora : Julia Chatarina
