BOBONARU, 09 Janeiru 2026 (TATOLI)-Ministériu Obra Públika (MOP) implementa, iha fulan-Marsu 2026, projetu reabilitasaun estrada rurál pakote ualu hamutuk kilómetru 16,453 iha munisípiu Bobonaru.
Projetu sira ne’e mak reabilitasaun estrada Sibuni bá Mapeo-op ho kustu másimu $520.449,94, estrada rurál Sibuni $649.275,06, Leo-Lima Faturui pakote I $404.269,90, Leolima Faturui pakote II $371.025,96, Leo-Lima Faturui pakote III $339.030,44, reabilitasaun Plum Concrete Bobonaru Tuluata $259.151.89, reabilitasaun estrada rurál Malilait Taimea $453.143,66, no Projetu FRC Scale-Up Rurál Road Kolejiu Manapa $649.275,06.
Koordenadór Infraestrutura MOP Munisípiu Bobonaru, Fernando de Fátima, dehan ekipa téknika lori ona empreza sira vizita lokál projetu durante semana ida no ramata ona horisehik, loron 08 Janeiru.
Fernando de Fátima informa karak Projetu FRC (Fiber Reinforced Concrete) iha pakote ida iha Kailaku, projetu estrada rurál pakote tolu iha Balibó no postu Bobonaru iha pakote haat.
Notísia relevante: Estrada rurál kilómetru 261 iha Bobonaro seidauk reabilita
“Ita sei halo mobilisasi meeting depois kompañia sira komesa hatama dokumentu konkursu iha loron 22 Janeiru agora. Rezultadu sei sai iha Fevereiru, la sala Marsu hahú implementa”, nia informa ba Tatoli, ohin.
Koordendór ne’e subliña katak projetu estrada rurál ba iha postu no suku sira seluk sei publika tan iha faze tuirmai ne’ebé tama iha prioridade tinan ne’e nian.
Biban ne’e, Fernando de Fátima husu ba autoridade lokál, liuliu komunidade atu koopera ho Governu no empreza, nune’e implementasaun projetu bele la’o ho susesu, tanba reabilitasaun ba estrada rurál ne’e laiha indemnizasaun. “Tanba ne’e, presiza ita hamutuk, nune’e dezevolvimentu bele la’o ho di’ak”, nia sujere.
Notísia relevante: MOP implementa projetu estrada rurál hamutuk 170 iha tinan ne’e
Jornalista: Sergio da Cruz
Editora: Maria Auxiliadora
