iklan

EKONOMIA, BOBONARO, HEADLINE, MUNISÍPIU

Estrada rurál kilómetru 261 iha Bobonaro seidauk reabilita

Estrada rurál kilómetru 261 iha Bobonaro seidauk reabilita

Kondisaun atuál estrada iha aldeia Oepho, suku Tapo, postu administrativu Bobonaro, munisípiu Bobonaro. Imajen espesiál.

BOBONARO, 11 juñu 2024 (TATOLI) – Dadus ne’ebé fó-sai husi Diresaun Servisu Obra Públika Autoridade Munisípiu Bobonaro, katak estrada rurál ne’ebé identifikadu eziste iha munisípiu Bobonaro hamutuk distánsia kilómetru 404,77, husi númeru ne’e reabilita ona kilómetru 54,50, prosesu implementasaun kilómetru 44,31, prosesu konkursu públiku ho distánsia kilómteru 44,03 no seidauk reabilita ho totál distánsia kilómetru 261,931.

Notísia relevante: Tinan 2024, Bobonaro hetan projetu estrada rurál pakote 14

“Ita-nia estrada ne’ebé seidauk reabilita, iha Atabae kilómetru 38,26, Balibo kilómetru 43,10, Bobonaro kilómetru 64,17, Cailaco kilómetru 80,84, Lolotoe kilómetru 18,00 no postu administrativu Maliana kilómetru 17,56, totál mak kiómetru 261,931 mak seidauk reablita, ita nafatin esforsu atubele aprezenta iha tinan oin,” Diretór Servisu Obra Públika Munisípiu Bobonaro, Marcelino Godinho, aprezenta dadus ne’e iha enkontru nível munisipál, segunda ne’e.

Enkuantu estrada rurál ne’ebé konsege reabilita ona iha postu administrativu Atabae kobre distánsia kilómetru 4,10, Balibó kilómetru 24,50, Bobonaro kilómetru 8,90, Cailaco kilómetru 4.00, Maliana kilómetru 13 no hosi parte postu administrativu Lolotoe sei iha prosesu elaborasaun dadus.

Nia dehan, estrada rurál ne’ebé sei iha prosesu implementasaun ka on going hela kilómetru 44,31, totál ne’e eziste iha postu administrativu Atabae kilómetru 18, Bobonaro kilómetru 13,81, Cailaco kilómetru 6,50, Lolotoe kilómetru 3.00 no Maliana kilómetru 3.

Nia akresenta, iha tinan ne’e Bobonaro hetan tán projetu reabilitasaun estrada rurál hamutuk pakote 14 ho totál distánsia kilómetru 44,03 ne’ebé dadaun ne’e sei iha prosesu konkursu públiku.

“Agora sira iha nasionál prosesu hela, karik hetan ona komapañia manán-na’in tempu badak ita bele implementa ona projetu pakote 14 ne’e,” nia katak.

Prezidente Autoridade Munisípiu Bobonaro, Alexandrino Pires, agradese ba governu no husu Ministériu Obra Públika atu kontinua prioriza halo reabilitasaun ba estrada rurál hirak-ne’ebe seidauk reabilita, nune’e bele fasilita movimentasaun komunidade.

Nia parte sei tún direita ba terrenu halo supervizaun ba projetu estrada rurál foun pakote 14 ne’e.

“Projetu sira ne’e, kuandu tempu cor ona, ha’u sei tún ba hamutuk ho sira, ha’u toba iha-ne’ebá hamutuk ho komunidade atubele hare cor ne’e tuir standar ka lae, nune’e ita bele hatene ninia kualidade, se lae balu naran tau ba de’it, importante hotu, ne’e labele,” nia hateten.

Enkuantu projetu foun estrada rurál pakote 14 ne’e postu administrativu Atabae ho totál distánsia kilómetru 4 hahú husi Balibó, Sanirin, Leo-Lima, Manduki.

Hosi parte postu administrativu Balibó kilómteru10 kompostu husi aldeia Raeluli-Postu UPF Has-Naruk, suku Cová ho kilómetru 4.00, kontinuasaun Raeluli-postu UPF Has-Naruk kilómetru 2,72, Balibo-Sanirin -Leo-lima-Manduki kilómetru 4.

Enkuantu postu administrativu Bobonaro totál pakote 2 ho distánsia kílometru 3,60, pakote dahuluk Lourba-Bobonaro kilómetru 2 no pakote daruak kontinuasaun Lourba-Bobonado kilómetru 1,6, postu administrativu Maliana pakote ida ho distánsia kilómetru 3 hahú husi Hali-Mesak-Lourvia.

Alende ne’e postu administrativu Lolotoe hetan pakote 3 ho distansia 11,7, Gole-Tepa ba Guda-Taz kilómetru 5,7, Atus-Gildapíl kilómetru 3 no kontinuasaun Atus-Gildapíl kilómetru 3.

Enkuantu postu administrativu Cailaco hetan pakote 4 ho distánsia kilómetru 10,98, Cailaco-Poerema kilómetru 1,5, Meligo-Cailaco Vila kilómetru 3, Cailaco Vila-suku Goulolo kilómetru 2,08 no Daudu-Genulai kilómetru 4,4.

Notísia relevante: Governu sei reabilita estrada rurál kilómetru 50,7 iha Bobonaro

Jornalista   : Sérgio da Cruz
Editór          : Evaristo Soares Martins

iklan
iklan

Leave a Reply

iklan
error: Content is protected !!