iklan

EKONOMIA, BOBONARO, HEADLINE, MUNISÍPIU

Tinan 2024, Bobonaro hetan projetu estrada rurál pakote 14

Tinan 2024, Bobonaro hetan projetu estrada rurál pakote 14

BOBONARO, 03 maiu 2024 (TATOLI)- Iha tinan 2024 ne’e munisípiu Bobonaro hetan projetu reablitasaun estrada rurál hamutuk pakote 14 hosi Ministériu Obra Públika ho kustu másimu millaun $5-resin.

Diretór Servisu Obra Públika Munísipiu Bobonaro, Marcelino Goncalves Godinho, esplika projetu ne’e sei implementa iha tempu badak, tanba daudaun ne’e to’o ona faze avaliasaun ba proposta empreza sira-ne’ebé tuir ona private meeting no vizita lokalidade projetu.

Nia subliña, projetu ne’e sei kobre postu administrativu haat, exeptu postu administrativu Atabae.

Notísia relevante: Governu sei reabilita estrada rurál kilómetru 50,7 iha Bobonaro

“Iha 2024 ne’e ita iha pakote 14, ne’e iha postu administrativu Lolotoe pakote tolu, Bobonaro pakote rua, Cailaco pakote rua,bBalibo pakote haat, Atabae tinan ne’e la hetan,” nia ko’alia iha Maliana, kinta ne’e.

Diretór Marcelino dehan, estrada rurál sira-ne’ebé seidauk halo reabilitasaun, Diresaun Servisu Munisipál Obra Públika kontinua tau iha planu prioridade ba Programa Dezenvolvimentu Intregadu Munisipál (PDIM) tinan 2025 atubele atinje meta ne’ebé define iha Planu Estratéjiku Dezenvolvimentu Nasionál 2011-2030.

Nia apela ba líder komunitária atu kontrola no koopera ho empreza konstrutora sira nune’e projetu hirak-ne’e bele la’o ho susesu no hatudu rezultadu kualidade.

Nia mos husu ba komunidade no trabaladór sira atu kolabora ho parte empreza no tékniku sira nune’e bele kontribui ba dezenvolvimentu iha suku no munisípiu Bobonaro.

Enkuantu projetu 14 ne’e komposta hosi pakote rua reablitasaun estrada rurál suku Lourba, postu administrativu Bobonaro.

Pakote tolu iha Lolotoe komposta husi reablitasaun estrada rurál Gole-Tepa, Guda-Taz, suku Guda, reablitasaun estrada rurál Atus Gildapíl pakote rua.

Enkuantu postu administrativu Cailaco pakote haat komposta husi reablitasaun Cailaco Poerema, Meligo Cailaco Vila, Daudu ba Genulai, estrada rurál Halimeak ba Larvia Cailaco.

Postu administrativu Balibo iha pakote haat komposta husi reablitasaun estrada rurál Railuli ba postu Unidade Patrullamentu Fronteira (UPF) Hasnaruk, suku Cowa pakote rua, reablitasaun estrada Balibo-Sanirin no Leolima-Manduki pakote rua.

Tuir dokumentu site visited ne’ebé Ajénsia TATOLI asesu, katak hosi reabilitasaun estrada pakote 14 nee ho totál kustu másimu millaun $5-resin (5,332,775.94).

Notísia relevante: MOP sei reabilita estrada rurál pakote 13 iha Bobonaro

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!