DILI, 07 Janeiru 2026 (TATOLI)—Ministériu Interiór (MI) no Komandu Jerál Polísia Nasionál Timor-Leste (PNTL) iha Janeiru tinan ne’e sei diskute hodi fihir figura Komandante Jerál inklui Segundu Komandante Jerál foun ba períodu 2026-2029.
“Hein de’it, ami hein hela prosesu. Ami prosesa hela, pois mak ita haree took, ha’u seidauk iha lista maibé komesa fulan ne’e ba oin to’o iha Marsu ami komesa diskute asuntu ne’e,” Ministru Interiór Francisco da Costa Guterres, hateten ba Jornalista sira hafoin partisipa iha reuniaun Konsellu Ministru ordinária iha Palásiu Governu, Kuarta ne’e.
Nia dehan, MI no Komandu Jerál sei prepara tan baze legál balun molok halo diskusaun kle’an ba asuntu.
Notísia relevante : Antigu Segundu Komandante PNTL hakotu iis
Tuir Dekretu-Lei númeru 35/2024 iha loron 18 Outubru kona-ba Estatutu PNTL, iha artigu Artigu 47.º ne’ebé ko’alia kona-ba Komandante Jerál:
- Komandante Jerál ne’e nomea no ezonera bazeia ba rezolusaun husi Governu sub-proposta husi membru Governu ne’ebé responsável ba área seguransa interna ho mandatu tina-tolu bele renova dala-ida de’it ba períodu ida tan.
- Nomeasaun ba Komandante Jerál tenke ho deviza Komisáriu Jerál Polísia ou Komisáriu.
- Sé mak atu nomea ba kargu Komisáriu tenke nia diviza ka postu Komisáriu no Komisáriu Asisténte.
Kargu Segundu Komandante Jerál tuir artigu 48 husi Dekretu-Lei númeru 35/2024 iha loron 18 Outubru kona-ba Estatutu PNTL mak hanesan:
- Segundu Komandante Jerál ne’e nomea no ezonera bazeia ba rezolusaun husi Governu sub- proposta husi membru Governu ne’ebé responsável ba área seguransa interna ho mandatu tinan-tolu bele renova dala-ida tan ba períodu ida tan.
- Nomeasaun ba Segundu Komandante Jerál tenke promove postu ba Komisáriu.
- Nomeasaun ba Segundu Komandante Jerál PNTL bele mai husi Polísia ne’ebé ho postu Superintendente Xefe Polísia.
Komandante Jerál PNTL, Komisáriu Jerál Polísia Henrique da Costa no Segundu Komandante Jerál PNTL, Komisáriu Pedro Belo Belo, antes ne’e hetan nomeasaun no pose iha ámbitu selebrasaun aniversáriu PNTL iha loron 27 Marsu 2023 ba manbatu tinan-tolu, nune’e iha 27 Marsu tinan sei termina mandatu.
Jornalista : Natalino Costa
Editora : Julia Chatarina
