DILI, 05 Janeiru 2026 (TATOLI)—Membru Polísia Nasionál Timor-Leste (PNTL) husi Komandu Munisípiu Ainaru na’in-tolu hetan kanek grave hafoin halo atuasaun ba konfrontu entre joven sira ne’ebé akontese iha Suku Soro no Suku Manu-Tasi, iha loron 31 Dezembru 2025.
Diretór Servisu Investigasaun Kriminál Nasionál, Superintendente Polísia João Belo dos Reis, hateten, kazu ne’e akontese tanba problema pasadu entre joven sira iha suku, ne’ebé autoridade suku rua la konsege rezolve.
“Membru PNTL na’in-tolu ne’ebé kanek deskonfia tiru arma branka ho kilat anin, ne’ebé prosesu operasaun ba sira la’o hela. Membru PNTL ne’e kondisaun balun fila ona, balun mak iha hela ospitál hodi kontinua ba prosesu operasaun hodi hasai senapan angin nia musan,” Diretór hato’o ba Jornalista sira iha ninia knaar fatin, Kaikoli, Segunda ne’e.
Nia dehan, membru PNTL na’in-tolu ne’e ho kondisaun grave tanba hetan tiru ho kilat ne’ebé balun kona ulun, balun kabun no balun kona hasan.
“Autór sira ba ida-ne’e ita kaer hotu ona, aprezenta ona ba Ministériu Públiku, balun Prizaun Preventiva no balun hetan Aprezentasaun Períodika,” nia akresenta.
Diretór haktuir, líder komunitária la tenta atu rezolve problema pasadu nune’e problema nia hun hadaet malu to’o agora.
“Ne’e problema entre joven, ita la ko’alia mete organizaun tanba ita deskonfia tanba fallansu husi líder komunitária sira atu apresia problema ba malu, problema ne’ebé sira halo,” nia katak.
PNTL antes ne’e halo ona identifikasaun ba suspeitu na’in-10 no vítima balun. Entre suspeitu sira, iha mós Xefe Suku Manu-Tasi.
PNTL rejista kazu ne’e iha Ministériu Públiku (MP) Suai ho númeru Rejistu Kriminál (NUC) 0002/2026-PNSIK.
Kazu ne’e submete ona ba Primeiru Interogatóriu Judisiál iha Tribunál Judisiál Primeira Instánsia Suai no supeitu hetan Aprezentasaun Períodika.
Aleinde ne’e, Autoridade Seguransa rejista gás rabenta iha Munisípiu Ermera durante natál no tinan foun. Polísia halo ona identifikasaun ba vítima na’in-neen inklui halo mós investigasaun ba suspeitu.
“Polísia sei halo hela identifikasaun ba kazu ne’e hodi hatene loloos katak serake vítima sira ne’e kanek no kauza husi sasán balun rebenta, ne’ebé investigasaun sei la’o hela atu define katak ida-ne’e gás mak fera ou fugetis mak fera hodi rezulta ema sira ne’e kanek. Investigasaun sei la’o hela hodi bele identifika didi’ak,” nia katak.
Notísia relevante : Konfrontu iha Suku Afaloikai, autoridade orienta suspeitu responsabiliza abitante nia uma ne’ebé estragadu
Maski nune’e, PNTL aprezenta ona kazu ne’e ba Ministériu Públiku.
Komandu PNTL rejista mós kazu ida akontese iha Baukau kona-ba perturbasaun orden públiku. Kauza joven sira asalta malu nune’e Polísia atua hodi hafahe sira no tiru gás hodi rebenta kona joven ida nia ain.
“Prosesu identifikasaun no prosesu investigasaun la’o hela no kazu ne’e rasik mós ami aprezenta ona ba Ministériu Públiku. Tuir regra utilizasaun ba gás lakrimozéinu Polísia uza atu hasa’e krime ne’e ba perturbasaun ne’ebé akontese iha terrenu,” nia tenik.
Ba kazu ne’e mak Polísia kuandu utiliza hanesan iha informasaun katak iha kazu balun iha Baukau Postu Administrativu Venilale, Polísia uza gás lakrimozéniu hodi tiru joven ne’e kuandu akontese, nune’e Komandu sei halo identifikasaun no investigasaun ba membru PNTL ne’ebé momentu uza gás lakrimozéniu hodi halo atusaun ba konfrontu ne’e.
“Gás ne’e nia funsaun atu hafahe ema, karik joven sira iha konflitu tenke uza ida ne’e hodi desvia husi konflitu ida ne’e”, nia informa.
Diretór Servisu Investigasaun Kriminál Nasionál ne’e mós infoma katak durante tinan foun PNTL rejista kazu asidente tráfegu fatál rua, ida iha Suai joven na’in-rua ho kondisaun lanu todan halai ho velosidadade maka’as uza motorizada konsege xoke malu no joven rua ne’e mate hotu, no mate isin entrega tiha ba família hodi halo prosesu funebre.
Nia dehan, iha mós asidente tráfegu fatál ida iha Dili ne’ebé mak Diretór Nasionál Tránzitu Seguransa Rodaviaria, Superintendente Xefe Polísia Antóninho Mauluta nian oan rasik lakon vida tanba hetan asidente únika, ne’ebé akontese iha parte Manleuana.
“Durante selebrasaun natál no tinan foun iha territoriu nasionál la’o iha ambiente ne’ebé kontroladu no trankuilidade, sarani sira selebra laiha perturbasaun ne’ebé grave,” Diretór hato’o.
Jornalista : Natalino Costa
Editora : Julia Chatarina
