VIKEKE, 05 Janeiru 2026 (TATOLI)—Xefe Suku Afaloikai, Postu Administrativu Uatulari, Munisípiu Vikeke, Cesário N. Pires, hateten suspeitu sira tenke hadi’a hikas abitante sira-nia uma hamutuk tolu ne’ebé sira estraga iha konfrontasaun ne’ebé akontese iha 31 Dezembru 2026.
“Konfrontu entre joven sira iha Suku Afaloikai ne’ebé akontese iha loron 31 fulan-Dezembru foin lalais ne’e, parte autoridade seguransa entrega fali ona suspeitu sira mai ami hodi rezolve kazu referidu. Maibé, atu rezolve kazu ne’e ha’u sei ko’alia ho suspeitu sira atu hadi’a abitante sira-nia uma ne’ebé hetan estragu husi konfrontu. Se suspeitu sira lakohi hadi’a, kazu ne’e tenke kontinua ba tribunál,” Cesário N. Pires ba TATOLI iha Postu Vikeke Vila, Segunda ne’e.
Notísia relevante: https://tatoli.tl/2026/01/01/selebra-tinan-foun-pntl-uatulari-kaptura-joven-nain-14/
Cesário haktuir konfrontu ne’ebé akontese iha Suku Afaloikai rezulta abitante sira-nia uma hamutuk tolu mak hetan tuda, balun janela rahun, odamatan rahun, kalén uma leten sai ku’ak.
Nia informa relasiona konfrontu ne’ebé akontese ne’e, parte autoridade sira iha ona planu no konkordánsia nune’e tempu badak sei implementa tara-bandu iha Suku Afaloikai, tanba ne’e sai hanesan meiu ida hodi minimiza konflitu iha suku laran.
Entretantu, konfrontu ne’ebé akontese iha Suku Afaloikai ne’e, Polísia Nasionál Timor-Leste (PNTL) Eskuadra Uatulari kaptura suspeitu hamutuk na’in-haat (4) kompostu joven husi Aldeia Dasu-Uati na’in-ida, Uaikai na’in-ida no Ossokaiua na’in-rua.
Jornalista: Vitorino Lopes da Costa
Editór: Xisto Freitas da Piedade
