DILI, 05 Janeiru 2026 (TATOLI)—Diretór Ensinu Sekundáriu Jerál (ESJ) Fitun Naroman Timor Lorosa’e (FINANTIL), Aniceto Berlelo hateten profesór ne’ebé atu hanorin matéria portugés, tetun no desportu laiha.
“Ita iha profesór 78 maibé ida-ne’e seidauk to’o, tanba iha matéria balun profesór laiha. Ezemplu, lingua portugés, tetun no desportu, ida-ne’e ita-nia profesór seidauk iha,” nia dehan ba jornalista sira iha nia kna’ar fatin, Aimutin, Dili, Segunda ne’e.
Diretór ne’e mós lamenta ho Ministériu Edukasaun, tanba halo tiha kolokasaun ba profesór na’in-18 husi eskola FINANTIL ba eslola sira seluk.
“Kolokasaun ida-ne’e ha’u mós ladún hatene, tanba la mai husu informasaun iha eskola, tanba iha-ne’e profesór 18 mak Ministériu Edukasaun koloka fali bá eskola seluk, depoiz sé mak atu hanorin iha nia fatin,” nia kestiona.
Kona-ba mekanizmu atu estudante labele lakon direitu, diretór dehan, matéria sira-ne’ebé profesór laiha, dalaruma profesór balun voluntariamente hakarak mai hanorin.
“Matéria sira-ne’ebé profesór laiha, dalaruma ita-nia alin balun mai voluntariamente iha-ne’e, ita haruka sira bele hanorin. Ida-ne’e mak meiu oinsá labele abandona estudante sira iha saladeaula,” nia hateten.
Nia rekomenda ba Ministériu Edukasaun, karik rekrutamentu profesór portugés, bele halo mós kolokasaun ba eskola ne’e atubele hanorin.
Jornalista: Osória Marques
Editór: Xisto Freitas da Piedade
