KOVALIMA, 07 Janeiru 2026 (TATOLI)- Prezidente Autoridade Munisipíu Kovalima, Miguel Armada Cardoso, tersa-ne’e, selebra renovasaun kontratu ho funsionáriu ajente administrasaun no funsionáriu apoia suku sira iha munisípiu Kovalima.
“Ha’u mós husu ba funsionáriu sira atu kuda disipliña no tau nasionalismu iha idaidak nia servisu fatin, nune’e iha konsiente ne’ebé bo’ot hodi partisipa iha atividade sira hanesan loron nasionál liuliu Isar bandeira atubele sente katak Kovalima ne’e ita hotu ni’an”, Prezidente Autoridade Munisípiu Kovalima, Miguel Armada Cardoso hato’o iha salaun AMC, ohin.
Autoridade Kovalima durante selebra renovasaun kontratu ho funsionáriu Ajente Administrasaun ho ofisiál suku sira ne’ebé maka durante ne’e presta sira-nia servisu ho responsabilidade hodi halo atendementu ba públiku.
Tuir dadus Autoridade Kovalima selebra renovasaun kontratu ho funsionáriu ajente administrasaun no ofisiál suku hamutuk 208 husi númeru ne’e funsionáriu Ajente Administrasaun hamutuk 88 ho ofisiál suku hamutuk 120.
Munisípiu Kovalima iha nia postu administrativu hanesan Fatululik, Fatumea, Fohorem, Tilomar, Maucatar, Suai no Zumalai iha nia suku 30 aldeia 148.
Jornalista :Celestina Teles
Editór :Florencio Miranda Ximenes
