DILI, 05 Janeiru 2025 (TATOLI) – Sekretáriu Estadu Komunikasaun Sosiál, Expedito Dias Ximenes, klarifika katak sei la redús funsionáriu kontratadu to’o na’in-50, maibé entre na’in-haat to’o sanulu.
Nia esplika sobre redusaun ba funsionáriu kazuál tanba iha Orsamentu Jerál Estadu (OJE) 2026, Governu halo redusaun ba ministériu hothotu nia osan, inklui SEKOMS liuliu iha saláriu no vensimentu.
Tuir nia, ho redusaun orsamentu ne’ebé iha kada ministériu halo ezersísiu hodi hamenus funsionáriu kazuál sira, maibé balun mós halo esforsu atu labele redús kontratadu sira.
“Espesiál iha Sekretaria Estadu Komunikasaun Sosiál [SEKOMS] mós hetan redusaun iha OJE 2026 kompara ho OJE 2025. Hetan redusaun 17% ba orsamentu saláriu no vensimentu”, governante ne’e informa.
Nia relata katak iha redusaun ba saláriu no vensimentu ba tinan ne’e to’o rihun $500, tanba iha OJE 2025 aloka millaun $1,6, maibé iha 2026 tun ba $1,1. Nune’e, presiza halo redusaun ba kontratadu sira.
Bazeia ba orientasaun ne’ebé nia parte hato’o ba Diretór Finansa no asesór SEKOMS sira atu halo ezersísiu oinsá labele redús barak.
“Ezersísiu ne’ebé halo, relatóriu ikus ne’ebé ohin dadersán relata mai ha’u dehan ita redús kontratadu kazuál husi 50 ba 22, maibé ha’u sente ida-ne’e mós ba ha’u barak liu. Entaun, ohin ha’u fó fali orientasaun atu uza polítika rasionalizasaun, entaun hapara de’it husi ema na’in-haat to’o 10”, Expedito Dias Ximenes iha Palásiu Governu, ohin.
Nia esplika katak diminuisaun ne’e halo ba sira ne’ebé nia avaliasaun dezempeñu ladún iha produtividade no laiha disiplina.
SEKOMS iha funsionáriu permanente 79 no kontratadu 157. Husi númeru kontratadu kazuál ne’ebé iha, halo polítika rasionalizasaun hodi propoin katak la presiza redús barak, maibé kontratadu sira ne’ebé nia serbisu konsidera importante, hanesan parte finansa, sira bele asina kontratu iha Janeiru 2026.
Ba sira ne’ebé iha kontestu la tama serbisu mós ladún influensia sei asina kontratu iha Fevereiru, no kazuál sira ne’ebé nia serbisu ne’e presiza iha tempu oportunu de’it asina kontratu iha Marsu 2026.
Iha biban ne’e, nia parte mós husu ba funsionáriu SEKOMS atu iha tinan 2026 halo serbisu hodi halo mudansa ba nasaun bazeia ba mensajen ne’ebé Primeiru-Ministru Xanana Gusmão hato’o iha isár bandeira iha semana dahuluk tinan 2026 nian.
Xefe Governu husu ba funsionáriu públiku no ajente Estadu hotu tenke sente katak 2026 tinan ne’ebé atu halo mudansa, iha atitude, hanoin, nune’e hanesan servidór Estadu nian fó atendimentu ne’ebé di’ak ba komunidade.
“Ho mesajen Primeiru-Ministru nian ne’e ita hanesan órgaun komunikasaun sosiál, ita-nia atendimentu kona-ba informasaun. Husu ita hotu ho meiu komunikasaun sosiál ne’ebé ita iha, ita hotu hein katak nafatin hamutuk fó informasaun ne’ebé ho kualidade, faktu no informasaun ne’ebé liu ona husi investigasaun ne’ebé di’ak”, dehan.
Jornalista: Arminda Fonseca
Editora: Maria Auxiliadora
