IGEADI halo poupansa ba orsamentu Estadu hamutuk millaun $6.8
DILI, 07 Janeiru 2026 (TATOLI)-Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P) halo poupansa ba orsamentu Estadu hamutuk $6.878.518,89 iha tinan kotuk.
Prezidente IGEADI, Ana Paula da Cruz, esplika katak poupansa ne’ebé institutu halo ne’e, tanba sira mak halo rasik serbisu melloramentu ba estrada, loke estrada foun, no seluk tan, ne’ebé la halo konkursu públiku ba empreza lokál hodi halo normalizasaun ba estrada sira.
“Ita halo poupansa ba gastu ne’ebé loloos Governu tenke hasai. Ami poupa gastu sira ne’e, ami rasik halo serbisu konverte ba osan karik hamutuk $6.878.518,89. Ida-ne’e ami bolu reseita sosiál”, Ana Paula informa iha nia knaar fatin Hera, ohin.
Dirijente ne’e mós relata sobre poupansa ne’ebé IGEADI halo ne’e ba serbisu melloramentu ba estrada iha territóriu hanesan loke dalan foun hamutuk kilómetru 35,551, melloramentu estrada kilómetru 140,598, normalizasaun ba sedimentasaun kilómetru 30,739, no seluk tan.
“Poupasansa ne’ebé ita halo ne’e di’ak, maibé buat ne’ebé ita hakarak mak oinsá komunidade bele sente serbisu IGEADI nian iha terrenu”, dehan.
Aleinde ne’e, iha 2025, IGEADI arrekada mós reseita ba kofre Estadu hamutuk $197.187,20. Orsamentu ne’ebé prevee ba IGEADI iha tinan kotuk hamutuk millaun $4.1.
“Tuir projesaun ne’ebé Ministériu Finansa fó ba ami iha 2025 tenke rekolla reseita hamutuk rihun $150, maibé ami rekolla ultrapasa hamutuk rihun $197-resin”, konklui.
Notísia relevante: IGEADI poupa orsamentu Estadu millaun $6-resin
Jornalista: Arminda Fonseca
Editora: Maria Auxiliadora
