iklan

EKONOMIA, HEADLINE

IGEADI poupa orsamentu Estadu millaun $6-resin

IGEADI poupa orsamentu Estadu millaun $6-resin

Ekipamentu pezadu IGEADI, Brigada Maria-Tapo, halo hela normalizasaun ba ponte iha área Samutaben, suku Manapa ligasaun hosi Postu administrativu Cailaco ba postu administrativu Maliana, ne'ebé hetan estragu hosi volume bee-mota Bulobu. Imajen Tatoli/Sérgio da Cruz.

DILI, 15 Janeiru 2025 (TATOLI) – Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI) halo poupansa, iha 2024, ba orsamentu Estadu hamutuk millaun $6-resin.

Prezidente IGEADI, Ana Paula da Cruz, esplika katak poupansa ne’ebé institutu halo ne’e tanba sira mak halo rasik serbisu melloramentu ba estrada no seluk tan no la halo konkursu públiku ba ba empreza lokál hodi halo normalizasaun ba estrada sira.

“Ekipamentu sira ne’ebé iha, ita rasik mak rezolve infraestrutura públika hodi halo melloramentu estrada, mota, loke estrada foun no seluk tan. Ita halo poupansa ba gastu ne’ebé loloos Governu tenke hasai iha 2024. Ami poupa gastu sira ne’e, ami rasik halo serbisu konverte ba osan karik hamutuk $6.063.337,8. Ida ne’e ami bolu reseita sosiál”, Ana Paula reitera ba Tatoli, iha Colmera, ohin.

Dirijente ne’e mós relata sobre poupansa ne’ebé IGEADI halo ne’e ba serbisu melloramentu ba estrada iha territóriu hamutuk kilómetru (km) 22.217, loke dalan ba komunidade ho 28.135 km, loke dalan foun 161.127 km.

Melloramentu estrada, apoiu komunidade no loke dalan foun ne’e hala’o iha munisípiu hotu, liuliun iha Manatuto-Natarbora, Viqueque iha mota Welolo, Bobonaro-Lolotoe no apoiu mós instituisaun Governu sira.

Iha 2024, IGEADE mós rekolla reseita ba Estadu liuhusi fó rentabilizasaun ba mákina sira ne’e ba komunidade, empreza lokál sira no fa’an britadeira ba komunidade no empreza sira.

“Orsamentu ne’ebé Governu aloka mai IGEADI 2024 hamutuk millaun $3,9. Ami moos buka reseita ba Estadu tuir projesaun ne’ebé Ministériu Finansa fó ba IGEADI iha 2024 tenke rekolla hamutuk rihun $150, maibé ami buka liu tiha projesaun hamutuk $215.134,31”, Ana Paula haktuir.

Notísia relevante: IGEADI poupa orsamentu Estadu millaun $1-resin

Jornalista: Arminda Fonseca

Editora: Maria Auxiliadora  

iklan
iklan

Leave a Reply

iklan
error: Content is protected !!