DILI, 09 juñu 2024 (TATOLI) – Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P), entre Janeiru no Maiu, halo ona poupansa ba orsamentu Estadu hamutuk millaun $1-resin, informa prezidente tutela, Ana Paula.
“Orsamentu ne’ebé tinan ne’e aloka mai ami hamutuk millaun $3,9. Husi janeiru to’o Maiu, atividade ne’ebé ita halo iha terrenu halo poupansa ba orsamentu Estadu hamutuk $1.447.458,65”, Ana Paula reitera ba Tatoli, iha Colmera, Dili.
Nia hatutan poupansa ba orsamentu Estadu ne’e mak IGEADI halo mak ba atividade normalizasaun mota, melloramentu mota, loke estrada foun ba komunidade, apoia instituisaun no seluk tan.
Aleinde ne’e, IGEADI mós tenke rekolla reseita ba tinan ne’e tuir Ministériu Finansa nia projesaun hamutuk rihun $150.
“Entaun, husi Janeiru to’o Maiu ami konsege rekolla ona orsamentu hamutuk $60.357,35. Ami fiar katak to’o Dezembru ami sei rekolla liu projesaun ne’ebé MF fó ba ami. Reseita ne’ebé rekolla mai husi atividade sira hanesan aluga ekipamentu pezadu no venda britadeira”, nia promete.
Orsamentu Jerál Estadu (OJE) 2024 ba IGEADI hamutuk millaun $3,9, ne’ebé aloka ba saláriu no vensimentu millaun $1,7 no ezekuta ona 30% ka $510.697,08, bens no servisu millaun $1,6 no ezekuta ona 26% ka 414.909,74 no kapitál dezenvolvimentu $643.325 no nia ezekusaun 3% ka $19.819.
Husi totál ezekusaun ba kategoria tolu ne’e hamutuk 945.426,60 ka 24% no nia balansu $3,023,975,40 ka 76%.
Rekorde katak, iha 2023, OJE ne’ebé aloka ba IGEADI hamutuk millaun $4,6.
Jornalista: Arminda Fonseca
Editora: Maria Auxiliadora
