DILI, 08 Janeiru 2026 (TATOLI)—Instalasaun Institutu Superiór Siénsia Polísia Nasionál Timor-Leste (PNTL) besik ramata.
Komandante Komandu Pesoa no Formasaun, Superintendente Xefe Arquimino Ramos, informa, daudaun ne’e iha hela faze elaborasaun estatutu ba instalasaun.
“Kona-ba estabelesimentu Institutu Siénsia Polísia iha ona prosesu. Ami halo ona pedidu lisensiamentu ne’e ba Ministériu Ensinu Superiór, iha kritériu balun ne’ebé presiza, Institutu ne’e priense ida mak fatin eskola ne’e rasik. Komandante Jerál sei hasai despaisu atu entrega Sentru Formasaun atuál ne’e ba Institutu Superiór Siénsia Polísia, ida-ne’e internál ne’e fasil atu halo,” Komandante hato’o ba Jornalista sira iha ninia knaar fatin, iha Batallaun Orden Públiku (BOP) Kaikoli, Kinta ne’e.
Enkuantu, estatutu ba instalasaun Institutu Superiór Siénsia Polísia ne’e daudaun hela iha Gabinete Ministériu Interiór (MI).
“Asesór sira sei elabora estatutu ne’e, bainhira lori ona ba Konsellu Ministru no aprova mak ita hahú estabelese institutu,” nia katak.
Notísia relevante : MESSK aseita pedidu PNTL estabelese ISSPol no Akademia Polísia
Kritériu lubuk ida mak priense ona. “Iha ne’ebá iha kritériu 10, agora ita hela de’it mak estatutu, tanba ne’e ensinu la’ós ba privadu no estatál, nune’e presiza estatutu ne’ebé tenke aprovadu iha Konsellu Ministru.”
Iha Lei Orgánika PNTL ne’e hakerek ona kona-ba Institutu Superior Siénsia Polísia no Akademia Polísia. Tanba ne’e husi PNTL elabora ona dokumentu sira no halo ona submisaun.
“Ita hatama ona ba Ministériu Ensinu Superiór no falta tan de’it estatutu ne’e mak submete ba sira mai ona halo avaliasaun, nune’e bele vizita bá eskola atubele haree kondisaun sira ne’e para bele fó lisensesamentu operasionál,” nia katak.
Akademia Polísia fó formasaun inisiál ba kadetis sira ne’ebé tama mai hanesan kandidatu ba ofisiál. Enkuantu, tuir proposta husi Komandu Jerál PNTL ne’ebé halo submisaun dokumentu ba instalasaun institutu, haruka ba Ministériu Ensinu Superiór Siénsia no Teknolojia, liuliu iha Akademia Polísia ne’e ba Eskola Baxarelatu iha Siénsia Polísia atu eskola durante tinan-tolu.
“Hafoin sira hotu husi ne’ebá mak sira bele kontinua ba Institutu Superiór Siénsia Polísia para kontinua lisensiadu nomós futuru mai bele kontinua ba mastradu, signifika katak kuandu kadetis membru PNTL ramata husi Akademia Polísia ne’e promeve kedan ba ofisiál subterranea,” nia subliña.
Tanba ne’e, Akademia Polísia ne’e halai liu ba ofisiál subterranea ne’ebé engresu ba kursu ofisiál subterranea ka ofisiál Asisténte Inspetór ne’e sira tenke eskola tinan-tolu.
“Sira ne’e rekruta mai husi sivíl depois sira eskola tinan-tolu no bainhira gradua mak promove ba Inspetór Asistente,” nia katak.
Enkuantu, rekursu atu hanorin iha Ensinu Superiór Siénsia Polísia no Akademia Polísia ne’e iha. Iha PNTL, rekursu iha grau doutoramentu iha ema na’in-rua, kandidatu doutoramentu na’in-ida, ne’ebé daudaun kontinua Estudu iha Indonézia.
“Aleinde ne’e, iha mós na’in-haat hasai lisensiadu no mastradu iha siénsia Polísia iha Portugal, ne’ebé sira balun termina ona, orsida balun sei tinan oin, balun sei tinan-rua, ne’ebé ita iha rekursu iha mastradu na’in-43, sira ne’ebé mak prepara atu ba hanorin iha Akademia Polísia no Institutu Superiór Siénsia Polisia,” nia informa.
Jornalista : Natalino Costa
Editora : Julia Chatarina
